Reportajen Estajiada Agustinha Amaral
Uma-kain 1524 hosi Suku Motael, Postu administrative Vera Cruz, hahú simu ona subsídiu dolar $200 iha Sukursal Banco Nacional de Comércio Timor-Leste (BNCTL) Obrigadu Barak, iha loron 6 fulan Dezembru 2022.
Xefe Suku Motael, Luis Antonio Candido Gusmão Viegas informa, ohin halo lansanmentu ba pagamentu Suku Motael hodi hahú simu ona subsídiu ba kada uma-kain. Iha Suku Motael kompostu hosi aldeia lima, no uma-kain hosi aldeia Farol mak sei simu uluk subsídiu refere. Total benefisiáriu hosi Suku Motael hamutuk uma-kain 1524.
Nia hatete, sira sei halo konfirmasaun di’ak tanba iha tinan rua liubá benefisiáriu ho saláriu menus dolar $500, sira hatama hotu lista maibé naran la sai, no ida ne’e akontese sira sei rezolve Liu hosi reklamasaun.
Líder Suku ne’e hato’o konabá dadus, sira iha 1700 i tal benefisiáriu, sira hatama hotu, tanba ne’e regra katak subsídiu ne’e universal, nune’e sira hatama mos lista Prezidente Parlamentu atual, Aniceto Guterres, no Prezidente sesante Aderito Hugo, inklui Prezidente Repúlika sesante Lu-olo.
“Naran ami submete ba maibé, ami foti dadus sira ne’e ami submete ba, depois ba ne’ebá mak ekipa husi Estatal no husi Sosial sira mak sei halo verifikasaun ba ida ne’e, se mak atu merese ba ida ne’e tanba ita hatene katak sira saláriu mais $500 ne’ebé ha’u fiar katak sira la kategoria ona simu direitu ba subsídiu fin du anu,” dehan Xefe Suku Motael.
Líder lokal ne’e akresenta, iha prosesu pagamentu mak sira nia naran la inklui iha lista ka la iha, mak sira sei prense formuláriu hodi halo reklamasaun ba parte relevante.
