Reportajen Joselina dos Santos
Sosiedade Sivil liu husi Core Group Transparency (CGT), halo Parseiru ho OXFAM Timor-Leste, Raes Hadomi Timor Oan (RHTO), no Asosiasaun Esperansa Feto Defisiénsia (AEFD), Ho ekipa Open the book, fasilita treinamentu ba Jornalista sirs ho objetivu atu fahe informasaun kona-ba Orsamentu Jerál Estadu (OJE), ne’ebé inkluzivu ba ema ho defisiénsia sira hotu.
Koordenadór Core Group Transparency (CGT), Sabino Gusmão “Fitun” hatete atividade ohin ne’e objetivu atu fahe informasaun ba jornalista sira kona-ba saida mak Siklu Orsamentu Jerál Estadu (OJE) báziku, tanba papél media importante tebes iha prosesu demokrasia no mos direitus umanus, tanba ne’e kolabora ho media sira, oinsá bele ajuda no foti beik-beik asuntu ema defisiénsia nian liga ho Orsamentu Jerál Estadu ne’ebe Inkluzaun ho asesivel.
“Ita hatene dezenvolvimentu durante tinan 20 resin ne’e la’o ladun asesivel ba ema ho defisiénsia hanesan Estrada, Edukasaun, Saúde no Infraestrutura, entaun informasaun ida ne’e importante tebes ba media sira atu bele hatene baziku kona-ba Orsamentu Jeral Estadu Inkluzaun ba ema ho defisiénsia sira nian”, dehan, Koordenador Core Group Transparency (CGT), Sabino Gusmão “Fitun” ba Neon Metin Hafoin Treinamentu iha Salaun Hak, Tersa 20/12.
Nia Husu ba media hodi servisu hamutuk ho sosiedade sivil atu bele hala’o kobertura maximu ba asuntu ema ho defisiénsia nian, Hodi bele fanu Ukun-na’in sira hanesan Governu, Parlamentu Nasional no Prezidente Republika hodi sira bele tau iha fuan tanba orsamentu barak mak gasta ona, maibé dezenvolvimentu ba ema ho defisiénsia ne’e nafatin menus, tanba sira mós iha direitu, maibé realidade maluk defisiénsia sira iha Timor nafatin terus liu-liu maluk defisiénsia sira ho matan.
“Ha’u kontente tebes tanba depois halo briefing iha tinan kotuk media barak mak ativu hodi foti asuntu ema ho defisiénsia nian, tanba ne’e ita tenke fó atensaun beik-beik atu nune’e asuntu ne’e sai hanesan preokupasaun ema hotu nian, espera katak tinan oin ita bele halo influensia ba ema ho defisiénsia tanba governu iha knaar boot hodi tau matan”, Nia esplika.
