Home Notisia Lu Olo Husu Autorizasaun Parlamentu Hodi Extende Estadu Emerjensia

Lu Olo Husu Autorizasaun Parlamentu Hodi Extende Estadu Emerjensia

308
0
Prezidente da Republika, Dr. Francisco Guterres Lu Olo. [Foto: Santina Lucia da Costa | 20.05.2020]

Reportazen Santina Lucia da Costa

Prezidente da Repúblika (PR), Francisco Guterres Lú Olo hafoin rona hanoin  ne’ebe  favoravel ba pedidu governu nian husi Konsellu Superior Defeza no Seguransa (KSDS) no Konsellu Estadu (KE), tanba ne’e Prezidente da Republika husu autorizasaun Parlamentu Nasionál ba estensaun estadu emerjénsia durante loron 30 hahu 00:00 iha loron 28 Maiu sei remata iha loron 27 fulan juñu 2020.

“Mensajen datoluk husi Prezidente Lú Olo husu autorizasaun Parlamentu Nasionál ba estensaun estadu emerjénsia ba periodu foun durante loron-30, sei hahú husi kinta feira, oras 00:00 28 maiu to’o sexta feira, oras 00:00 27 juñu 2020,” esplika liu hosi komunikadu imprensa ne’ebe Neon Metin asesu iha palasiu presidensial Nicolau Lobato, Dili, 26/05.

Esplika  iha komunikadu imprensa katak implementasaun estadu emerjénsia ba loron-30 ba oin sei suspende parsialmente direitu no garantia balun hanesan sirkulasaun internasionál, liberdade ba sirkulasaun no fixasaun rezidénsia iha pontu ne’ebé de’it iha territóriu nasionál no direitu ba rezisténsia.

Tanba Timor-Leste rasik deklara tiha ona laiha kazu konfirmadu ho COVID-19, tanba ne’e  ema na’in-24 hotu-hotu rekuperadu no la hamate ema ida, maibé ne’e la signifika Timor-Leste livre ona husi COVID-19.

“Ha’u-nia konviksaun katak impozisaun ba manuntesaun medida konjuntu importante atu prevene virus SARS-CoV-2 tama ba ita-nia territóriu no ninia transmisaun entre populasaun ne’ebé moris hamutuk, hanesan bandu ema tama territóriu nasionál, impoin izolamentu obrigatóriu ba kazu determinadu sira no sujeisaun obrigatóriu ba rezidente iha Timor-Leste tuir medidas kontrolu sanitáriu”, dehan Prezidente Francisco Guterres Lu-Olo

Iha komunikadu ne’e Prezidente da Republika fó hanoin hikas ba membru Parlamentu Nasional sira katak nesesidade ba estensaun estadu emerjénsia iha ligasaun forte ho evolusaun preokupante ba situasaun epidemilojójika no proliferasaun kazu rejistradu transmisaun komunitária COVID-19 iha Repúblika Indonézia, partikularmente iha Timor Osidentál, ne’ebé ezije nafatin manuntensaun ba aplikasaun sasukat estraordináriu balun, ne’ebé ladun makaas, atu trava pandemia, evita transmisaun kazu foun ba infesaun coronavirus foun iha territóriu nasionál.

“Estadu implementa estadu emerjénsia ho objetivu atu hases sidadaun hotu-hotu iha Timor-Leste husi kalamidade públika ne’ebé bele mosu husi COVID-19,” haktuir PR iha  komunikadu.

 Parlamentu Nasionál sei diskute mensajen Prezidente da Republika nian hodi desidi aprova ou lae. Prezidente da Republika sei deklara sekarik estadu emerjénsia ba periodu foun bainhira hetan autorizasaun husi Parlamentu Nasionál.

LEAVE A REPLY

Please enter your comment!
Please enter your name here