Reportajen Estajiada Agustinha Amaral
Governu liu hosi Ministériu Obras Publikas (MOP) apoiu Institutu de Gestão Equipamentos e Apoiu do Dezenvolvimentu Infraestrutura (IGEADI), I.P, lansa Brigada IGEADI tuir Estatutu no Diploma Ministerial Aprovadu, hodi apoiu komunidade sira nia pedidu ne’ebé presiza liu-liu loke estrada foun, mellorentu estrada, normaliza mota no mos atende situasaun emerjénsia sira seluk.
“Ohin loron Ministériu Obras Publika, apoiu tebes ami iha atividade sira ne’ebé mak IGEADI husi IGE transforma ba iha IGEADI, halo lansamentu ba iha brigada sira liu-liu hanesan Brigada Daitula, Samba Sembilan, Maria Tapo, Rosa Muqui Bonaparte, Sebastião Gomes, no mos iha ekipa task force operasionál, atu bele apoiu ita nia komunidade sira presiza liu kona ba loke estrada foun no seluk tan,” Prezidente IGEADI Ermenezilda da Costa Laurentina, ba Jornalista sira iha Resintu IGEADI, Kaikoli, segunda 16/01.
Nia dehan komunidade ne’ebe mak presiza liu-liu loke estrada foun, normaliza mota n omos atende situasaun emerjensia ne’ebe mak komunidade sira presiza, ho lansamentu ida ne’e espera katak halo servisu responsabilidade ne’ebé mak fo. Espera sei servisu di’ak liu tan ba rai doben Timor-Leste.
Kada Brigada sei kobre munisípiu 3 mak hanesan Brigada Daitula kobre iha munisípiu Baucau, Vikeke ho Lautem, Brigada Roza Muqui Bonaparte kobre iha Manatuto, Manufahi no Ainaro, Brigada Maria Tapo kobre iha Bobonaro, Covalima ho Ermera, Brigada Samba Sembilan Aileu, Liquisa no Dili sorin, iha Brigada Sebastião Gomes hanesan Brigada rezerva, servisu hanesan alugér iha Dili laran no mos servisu emerjénsia sira iha munisípiu Dili.
Orsamentu ba projetu ne’e hamutuk $4.6 ital miloens, fasilidade kada Brigada iha mákina Excavator 200, iha exca 130 no exca 20, Buldozer, motor grader operasionál, vibration roller, dump truck no karreta operasional.
Nia konklui IGEADI finaliza ona 325 pedidus, no sei iha tan 200 i tal pedidus iha Timor-Leste ne’ebé mak sei kontinua, tanba ho kondisaun mákina ne’ebé mak seidauk sufisiente no servisu tuir mákina ne’ebé mak iha.
