Reportajen Umbelina dos Reis
Ministru Edukasaun Juventude no Desportu (MEJD), Armindo Maia iha abertura ba Kolókiu Validasaun Opsaun Polítika ba Jestaun Dezastre Naturais, relasiona ho edukasaun iha Timor-Leste hatete, kolókiu ne’e importante tebes hodi halo konsultasaun ho parte relevante sira, tanba Timor-Leste kada tinan sempre afeta dezastre naturais.
Nia dehan dezastre naturais ne’ebe akontese iha loron 4 Abril 2020, nu’udar problema sériu tanba fo impakt destruisaun sira, no eskola barak mak afeta ba akontesimentu ne’e
Ministru Armindo informa katak iha fulan Janeiru ne’e mós udan no anin boot, nia impaktu eskola hamutuk 20 resin mak hetan estragus, hanesan ita hatene iha fulan Janeiru orsamentu ezekusaun sedauk la’o, nune’e Ministériu Edukasaun husu ba perseiru sira hanesan UNICEF ho Plan Internasional hodi ajuda.
“Eskola ne’ebé mak hetan estragus iha fulan hirak liu ba mak hosi munisípiu Viqueque, Aileu, Ainaro, Bobonaro, Covalima, orsamentu no material sira ne’e apoiu hosi parseiru UNICEF ho Plan Internasionál ne’ebé mak koloka ba eskola refere, tinan 2023 ne’e ita koloka ona orsamentu para bele sosa material ba eskola sira ne’ebé mak hetan estragus,” dehan nia.
Nia hatutan kolókiu Validasaun Opsaun ne’e importante no oportunidade hodi hamosu krítiku iha publíku no estudante sira iha Timor-Leste, atu hamutuk ajuda re-imajina sistema edukasaun no opsaun aprendizajen ba labarik sira iha país.
Iha kolókiu ne’e, MEJD liu hosi Diresaun Nasionál Asaun Sosial no Asuntu Sanitáriu (DNASEAS) servisu hamutuk ho UNICEF no Plan International halo konsultasaun ho parte relevante sira inklui autoridade lokál no eskola sira hodi rona esperiénsia kona-ba servisu edukasionál durante tempu emerjénsia.
