Reportajen Silvino Freitas
Universidade Nasionál Timor Lorosa’e (UNTL) sei realiza graduasaun faze daruak tinan akadémiku 2022, iha loron 24 Fevereiru 2023, tanba númeru estudante bo’ot nune’e prosesu toga ba estudante to’o tarde.
Vise-Reitór Asuntu Akadémiku Garantia Kualidade UNTL Samuel Venancio Freitas hateten, tuir kalendáriu akadémiku graduasau hala’o iha tinan ida dala rua iha semestre 1 no 2.
“Tuir loloos ne’e ita nia graduasaun ne’e hala’o iha Dezembru, tanba saida mak ita la halo, ita nia problema ne’e la’ós kestaun akadémiku maibe kestaun prosesu toga ba estudante sira” dehan Visi-Reitór iha nia kna’ar fatin kampus-sentrál UNTL (01/02).
Tuir nia, toga ne’ebé estudante sira uza sei lori ba uma, tanba sosa ho sira nia osan rasik, nune’e iha graduasaun foun tenke sosa fali toga foun, maibé prosesu sosa toga tenke tuir regra fiansiamentu estadu.
“Osan sira ne’ebé sosa toga ne’e la’ós osan privadu, maski osan ne’e rekolla husi estudante sira maibé iha regra universidade atu sosa ne’e tuir finansiamentu estadu nian, tuir tender ba tinan fiskál sira” nia esplika.
Nia dehan toga ne’ebé iha ona prosesu ne’e ba estudante hamutuk 1380 kompostu husi lisensiatura no pos-graduasaun, no daudaun ne’e universidade hein hela toga atu raliza graduasaun iha 24 Fevereiru, maibé éspera katak antes ne’e toga to’o ona.
“Agora ita hein loos de’it ba buat rua ida toga mai husi kompaña para estudante sira uza hotu sira lori ba uma, seluk fali maka omologasaun husi Ministério, sira sei halo lais liu no dokumentu ba omologasaun ne’e hasai kleur tiha ona husi universidade” nia dehan.
Nia konklui, fatin ba graduasaun mak sei iha desizaun ba fatin rua entre Jinaziu Munisípiu Dili no Sentru Konvensaun Dili (CCD), tanba númeru estudante barak.
