Reportajen David da Costa
Segundu Vise Partidu Libertasaun Popular (PLP), Demetrio Amaral hateten, iha eleisaun Parlamentár 2023, atu lakon ka manan, PLP servisu ho nonook deit, husik rezultadu eleisaun maka hatudu.
“Husik ema ko’alia, ami servisu ho nonook rezultadu mak sei hatudu ami nia servisu,” Devan Segundu Vise PLP, Demetrio hafoin enkontru ho Prezidente Repúblika, Dr Jose Ramos-Horta iha Palásiu Prezidente Bairo-Pite, Sesta 3/02.
Alende ne’e Segundu Vise PLP, Demetrio haktuir, ohin Xefe Estadu konvida PLP hanesan konsultasaun ida ho partidu polítiku sira, ohin mai reprezenta Partidu PLP hodi fó opiniaun iha konsultasaun ne’ebé Xefe Estadu inisia, kona-ba Xefe Estadu nia desizaun deklara eleisaun Parlamentár 2023
“Husi PLP ami nia opiniaun eleisaun jerál ida ne’ebé mosu, depois tinan 20 Restaurasaun Indepedénsia, ita hakarak atu eleisaun ida ne’ebé la’o ho kualidade ne’ebé rekere ita nia preparasaun di’ak entermus lójistika, entermus kuadru legál sira ne’ebé guia operasionalizasaun prosesu eleisaun sira no mós rekursu umanu ne’ebé bele operasionaliza sistema sira ne’ebé ita diploi ba fó andamentu eleisaun jerál ne’ebé ita sei hala’o no fundu husi PLP, “ nia esplika.
Tanba haree iha biban ida ne’ebé Xefe Estadu mós koñesidu iha mundu. Hanesan Laureadu Nobel da Pas, tanba ne’e eleisaun jerál ne’ebé akontese depois tinan 20 ne’e tenke eleisaun jerál ida ne’ebé hala’o iha biban ida ne’ebé trankuillu ho akontabilidade no mós demostra lideransa sira hotu ninia intelejensia jestaun ba prosesu eleisaun ne’e rasik.
“Hanesan partidu polítiku kuadru legál ne’ebé ami tuir mak kona-ba lei partidu polítiku ninian, ami hanesan partidu polítiku prepara an tebes hanesan partidu polítiku,” tenik nia.
