Reportajen Estajiada Agustinha Amaral
Ministru Edukasaun Juventude no Desportu (MEJD), Armindo Maia klarifika relasiona ho desizajun Ministériu nian, atu halo suspensaun ba ensinu aprendijazen eskola Sekundária Tékniku Vokasional (ESVT) tolu iha munisípiu Ermera, tanba presiza kompleta rekezitus, nune’e sira iha konsesu atu re-konverte fila-fali ba ensinu sekundáriu jeral.
“Ita haree katak, eskola tékniku vokasional la priense rekejitus, maibé ministériu mos la taka de’it, maibé buka dalan ba sira tanba ne’e ami iha ona konsensu ruma katak, bele haree prosesu atu bele re-konverta fila-fali para labele prejudika labarik sira ne’ebé agora sira rejista tiha ona,” dehan Ministru, Armindo Maia ba jornalista iha nia knaar fatin Vila-Verde, segunda, 06/02.
Nia dehan iha eskola ida ka rua ne’ebé privadu sira tenke halo deklarasaun ba iha Ministériu Edukasaun katak, fundasaun iha kapasidade duni para hala’o duni eskola ida ne’e. “Ami ejije sei loke eskola tenke iha kapasidade para hala’o eskola ne’e ba oin. Ha’u hakarak hatete katak, iha semana ne’e nia laran iha ona dalan ba sira,” tenik nia.
Pur tantu eskola ESTV tolu (3) ne’ebé mak MEJD mensiona mak hanesan, Eskola ESTV Raikala lokaliza iha Postu Administrativu Ermera, Suku Estadu, ESTV Calbale iha Postu Letefoho, Suku Lauana no ESTV Reman Bote lokaliza iha Postu Atsabe, Suku Lasaun tanba eskola hirak ne’e la priense rekejitus sira ne’ebé mak iha. “Antes mai asumi mandatu iha ne’e katak eskola lubuk ida mak konverte ba tékniku vokasional, afinal naran de’it mak konverte,” tanba ne’e Ministru ne’e hatete, presiza haree nia rekezitus atu nune’e ba futuru eskola ne’e bele la’o oin.
