Reportajen Estajiada Agustinha Amaral
Sekretária Estadu ba lgualdade no Inkluzaun (SEll) Ho CARE Internasional Timor-Leste (CITL) asina akordu hodi hametin kooperasaun, liu-liu hametin igualdade jéneru no inkluzaun iha Timor-Leste.
Haktuir Sekretária Estadu, Maria Do Rosário Fátima Correia hatete akordu ne’e aliña kedas ba dikretu lei nú. 17/2019 ba objetivu haat SEII nian, primeiru mak oinsá mak atu halo advokasia liu husi estratejia ba abordagen intergradu jéneru husi politikas, lei, orsamentu no planu. Segundu mak oinsá atu reforsa ou redus siklus violénsia labarik feto no mos maluk defisiénsia sira no komunidade.
Terseiru mak oinsá atu reforsa feto iha parte ekonomia no ikus liu, oinsá atu fo espasu ba feto atu foti desizaun iha nível nasional munisipal no mos suku.
“Primeiru objetivu SEII halo advokasia hodi hala’o estratejia proteje igualdade jéneru iha polítika, planu iha orsamentu no segundu objetivu mak oinsá reduz violénsia hasoru feto no labarak feto no maluk difesiente no komunidade difisiente sira,” dehan Sekretária Estadu Maria do Rosário Fátima Correia ba jornalista iha nia knaar fatin, Kaikoli, Segunda, 06/02.
Nia dehan, akordu mos ho CARE Internasional atu servisu hamutuk hodi nune’e haree di’ak liu tan ba tinan demokrasia ida ne’e, ne’ebé Timor-Leste sei hala’o eleisaun parlamentar. “Oinsá atu identifika tinan ne’e ita iha Elisaun Parlamentar nomós eleisaun ba autoridade lokal sira, oinsá mos bele fo formasaun no kapasitasaun ba feto maluk sira iha área rural atu nune’e sira mos brani kandidatu aan ba Xefe Suku,” Nia hato’o.
Iha fatin hanesan Diretor Care Internasional, Peter Goodfellow, afirma, servisu ho komunidade sira iha área rural no hamutuk ho parseiru sosiedade sivil sira atu luta hasoru dezigualdade jéneru, tanba ida ne’e hatudu ona katak, dalan efetivu ida atu kria impaktu ba dezenvolvimentu ne’ebé sustentável, asegura moris di’ak no rona feto no labarik feto sira nia lian iha área ne’ebé rural no ne’ebé sai nu’udar sentru ba Care nia servisu.
“lda ne’e atinje liu husi área prioridade haat hanesan edukasaun, hakbiit feto sira nia ekonomia, saúde no promove feto sira nia lian iha sosiedade liu hosi programa dezenvolvimentu umanitáriu sira,” dehan Diretor Care.
Enkuantu akordu ida ne’e hametin Care nia kolaborasaun ho Sell ho objetivu atu foka liu tan ba prioridade mútua sira ba emporadementu feto iha ekonomia, feto nia partisipasaun iha foti desizaun, no prevensaun violénsia bazeia ba jéneru iha setor hotu iha Timor-Leste.
Pur tantu parseria ida ne’e sei válidu ba tinan rua, no ida ne’e bazeia ba komprimísiu komun atu avansa igualdade jéneru. Entidade rua ne’e iha komprimisiu atu kolabora iha inisiativa xave sira hanesan dadi’ak feto nia partisipasaun iha prosesu foti desizaun liu husi inisiativa hasa’e kapasidade sira, akonsellamentu no suporta ho rekursu hametin integrasaun jéneru iha polítika, programa, no alokasaun orsamentu iha setor hotu-hotu, prevensaun no eliminasaun violénsia hasoru feto no labarik feto.
“Care no SEll fahe vizaun hanesan konabá sosiedade ida ne’ebé igual no justu, no ida ne’e hanesan onra ida atu formaliza ami nia komprimísiu atu servisu hamutuk atu atinje vizaun ida ne’e. Hamutuk, ami sei luta hodi hetan oportunidade atu feto sira bele lidera no partisipa iha nível hotu iha sosiedade, atu inspira feto no labarik feto sira seluk atu atinje sira nia potensial tomak atu sai na’in ba foti desizaun iha futuru,” diretor Care klarifika litan konaba akordu ne’e.
