Home Notisia Aldeia Lia Uai Oli – Ossu, Sedauk Asesu Estrada & Eletrisidade

Aldeia Lia Uai Oli – Ossu, Sedauk Asesu Estrada & Eletrisidade

143
0
kondisaun estrada iha Munisipiu Viqueque, Postu Administrativu Ossu, Suku Loi-Huno, Aldeia Lia-Uai-Oli. [Foto: Santina Lucia da Costa | 23.11.2019]

Reportazen Santina Lucia da Costa

“Ami sei iha nakukun laran tanba eletrisidade seidauk tama, ami kalan atu han sunu de’it ahi tradisional, hanesan kamii ho kabas tradisional, tau hamutuk fai dodok tiha, mak foin kumu ba ai, se osan iha ami hola lilin mak foin sunu hodi han”. Angela

Povu hetan ona nia referendum hosi ukun kolonizlismu, iha tinan ida ne’e tama ona 20, nasaun ne’e ses hosi ukun kolonializmu.

Maibe ida ne’e sedauk naton hodi liberta povu hosi mukit no kiak, problema ne’ebe povu hasoru iha area rural, to’o ohin loron sedauk hetan resposta hosi ukun nain sira. Munisipiu Viqueque, Postu Administrativu Ossu, Suku Loi-Huno, Aldeia Lia-Uai-Oli, desde Indonesia nia tempu to’o ohin loron, seidauk asesu ba estrada ho eletrisidade, komunidade lao ain ba fa’an sasan iha merkadu.

Tuir xefe Aldeia Lia-uai-oli, Juvinal da Costa katak, Estrada iha Indonesia nia tempu kedas to’o agora laiha rehabilitasaun, povu ezizi ba estadu, maibé estadu mós nunka mais tau matan, durante ne’e sira seidauk asesu ba estrada di’ak, nune’e mós eletrisidade, husi Ossu villa to’o iha aldeia Lia-uai-oli kuaze 5 kilo de’it, durante ne’e sira sei iha nakukun nia laran.

“Ita ukun-an tinan 17 maibé ami kontinua halerik ba estrada ho eletrisidade no ami seidauk senti lolos dezenvolvimentu ida, ami lao ain de’it to’o iha merkadu Ossu-villa, hodi fa’an ami nia modo tahan sira, ema seluk senti ona rai naroman, maibé ami sei iha nakukun laran”, konfesa Xefe Aldeia Lia-Uai-Oli, foin lalais liu husi via telephone ba jornalista Neon metin.

Juvinal da Costa hateten, durante ne’e sira seidauk halo proposta, maibé formasaun husi NGO ruma sira sempre hato’o beibeik, mais NGO lokal balun mai sukat hela de’it maibé to’o agora la realiza,.

“Hau sei konfundi hela maka foin dadaun ILO mai sukat dehan realiza iha fulan Agustu maibe fulan Agustu liu ona, sira dehan hein tan Septembru, depois liu tan tiha ona, ne’ebé ami hein tan fulan Novembru ida ne’e sira realiza ka lae, ami seidauk hatene”, hateten Juvinal da Costa.

Juvinal ba Neon Metin mos hatoo katak eletrisidade iha tempu liu ba sira nia proposta ida ba kompaña Elsasi.Lda, sira hatama ona iha ne’eba, sira dehan sei realiza iha tinan 2020 ne’ebé sira hein 2020, se la realiza mak sei kontinua hato’o proposta ba.

Iha parte edukasaun nian, labarik sira iha aldeia Lia-uai-oli atu ba eskola, sira tenke lao ain husi aldeia to’o iha Ossu villa ho kilometru 5 mak foin to’o iha eskola. Nune’e mós ba parte saude nia mós hanesan, ne’e lao kilometru 8 mak foin to’o iha sentru saude.

Iha parte seluk komunidade Angela Amaral hateten, kada loron Kuarta ho Sabdu, sira lori modo ba fa’an dadersan nakukun, tuku 3:00-4:00 madrugasa komesa lao ona, to’o iha merkadu mak foin rai naroman, hodi fa’an modo, se karik t modo ema hola hotu ona, sira fila sedu, sekarik la hotu dalurma fahe deit ema seluk, se lae sira troka tiha ba sasan balun ne’ebé mak sira presija.

“Maske do’ok maibé ami la senti do’ok, se ami la fa’an se mak atu fó han ami no se mak atu selu ami oan sira nia eskola, liu husi ami nia esforsu ida ne’e mak hodi selu ami oan sira nia eskola laiha tan dalan seluk”, tenik Angela

Angela husu ba governu hodi bele hadia estrada no monta elestrisidade, hodi nune’e sira bele asesu transporte publiku,, hodi tula sasan sira ne’ebe atu ba faan iha merkadu

“Ami sei iha nakukun laran tanba eletrisidade seidauk tama, ami kalan atu han sunu de’it ahi tradisional, hanesan kamii ho kabas tradisional, tau hamutuk fai dodok tiha, mak foin kumu ba ai, se osan iha ami hola lilin mak foin sunu hodi han,” tenik Angela.

Total uma ka’in ne’ebé mak hela iha aldeia refere hamutuk 39 no total populasaun 396 pesoal.

 

LEAVE A REPLY

Please enter your comment!
Please enter your name here