Reportajen Umbelina dos Reis
Deputadu Bankada Partidu Libertasaun Popular (PLP), Francisco Vasconcelos krítika deklarasaun Prezidente Repúblika (PR), ne’ebé hatan pergunta jornalista nian, konabá haruka nia Xefe Kaza Militár Interinu halo intervensaun ba buska aprensaun Armas Ilegais, iha Eis Komandante PNTL Longuinhos Monteiro nia rezidénsia.
“Hau krítika Prezidente Repúblika ne’ebé halo deklarasaun bainhira hatan perguntas Jornalista nian konaba Prezidente haruka nia Xefe Kasa Militar Interinu halo intervensaun ba buska aprensaun ba Armas ilegais iha Vatuboro, Lo’es,” Kestiona Deputadu Francisco iha Plenaria Parlamentu Nasionál, Segunda-feira, 20/02.
Nia hatete, altura ne’eba Prezidente hatan katak, nu’udar komandante Supremu tanba ne’e nia garantia ida ne’e, iha Konstituisaun da Repúblika hateten nia kompetensia rasik nia deklara funu no halo paz.
Nia hatutan Prezidente Repúblika nu’udar Xefe Estadu nia halo intervensaun ba kazu sira ne’ebe kompetensia Polícia Científìca Investigação Criminal (PCIC). Nia dehan depois Longuinhos iha kilat agora rai barak iha nia rezidensia kuandu iha segundu mandadu tribunal nian, PCIC ba halo buska aprensaun Xefe Kasa Militar Interinu mosu iha ne’eba i Prezidente Repúblika konkorda katak nia haruka hodi garante integridade servisu investigasaun, ida ne’e mak dehan orgaun pasa poderes, abuza poder.
Nia esklarese, Prezidente Repúblika deklara katak nu’udar Komandante Supremu ba halo aktus hirak kona-ba instituisaun relevante sira nian, se hanesan ne’e lalika presija. Iha Prezidente Repúblika nia entervista nia sei husu tan Xefe Estadu Maior, atu husu Polísia Militar labele intervein tuun sa’e konaba kazu sira ne’ebé kompetensia Polisia nian, labele haruka Polísia Militar ba mete iha atuasaun sira iha kazu ne’ebé mosu iha fatin hotu-hotu.
“Maibe Prezidente Repúblika konsienta katak ida Prezidente Repúblika halo ne’e mak los, nia haruka nia Xefe Kaza Militar ba halo intervensaun boikota para haruka fila fali PCIC sira sai husi fatin para sira labele halo buska aprensaun,” nia krítika.
