Reportajen Silvino Freitas
Estrada liga postu Letefoho ba suku Ducurai ho kondisaun grave, difikulta tebes komunidade sira atu asesu ba sentru saúde, liuliu atu lori moras no inan isin-rua ba postu saúde, iha tempu udan.
Komunidade Celestino Maria Soares haktuir bainhira iha tempu udan, susar tebes ba sira atu lori moras sira ba iha postu saúde iha Letefoho.
“Tempu udan ami atu lori moras sira labele, maibé karik moras ne’ebé grave ona entaun ami obriga tenke lori to’o iha postu Letefoho” Celestino haktuir.
Iha fatin hanesan Xefe Aldeia Laclo Francisco Dias Soares hateten, estrada ne’ebé ladi’ak difikulta tebes ba komunidade ne’ebe moras no inan isin rua sira, atu halo konsulta ho médiku sira.
“Iha tempu udan hanesan ne’e susar tebes ba ami, bainhira tempu bailoron ne’e di’ak maibé udan, susar tebes tanba ami telfone ba pesoál saúde sira mós labele mai tanba kondisaun udan halo dalan nakonu ho tao-dodok” dehan Xefe aldeia Laclo Francisco Dias Soares(21/02).
Nia dehan solusaun ba sira atu lori moras sira no inan isin rua ba ospitál mak husu ajuda ba viziñu sira ne’ebé iha transporte no karik laiha mak la’o ain de’it ba iha postu saúde maske iha moras grave no inan isin-rua.
Entretantu Xefe Suku Ducurai Rafeal Maia haforsa tan katak, dalan ne’ebé liga mai iha suku Ducurai grave tebes, maibé daudaun ne’e tama ona planu reabilitasaun husi projetu Banku-Mundiál nian.
“Dalan husi postu mai iha suku Ducurai dook, maibé pesoál saúde sira iha sentru saúde Letefoho mós iha koperasaun ne’ebé di’ak bainhira iha moras sira kontaktu sira sempre mai hodi halo atendimentu” Xefe Suku Ducurai esklarese, (21/02).
Suku Ducurai iha aldeia 13, ho totál uma kain 1.249 no populasaun hamutuk 6.211 kompostu husi feto 3.052 mane 3.159.
Nutisia ne’ebe Neon Metin Publika, nu’udar parte husi programa Media Tour ne’ebe organiza husi Oxfam iha Timor-Leste no Asosiasaun Jornalista Timor Lorosa’e (AJTL) liuhusi projetu Atavismu Ambientál, ne’ebe apoiu husi Oxfam Internasionál
