Reportajen Umbelina dos Reis
Reprezentante Country Director OXFAM Internasionál iha Timor-Leste, Feliciano da Costa Araujo hateten Oxfam iha kometimentu apoiu nafatin parseiru sira liu-liu FONGTIL nia membru sira, oinsá bele halo influénsia ba iha polítika ka kebijakan sira, liu-liu kontestu agora, atu haree liu ba asuntu inkluzivu iha eleisaun parlamentár nian hanesan justisa jéneru, justisa klimátika, justisa ekonomia no envolve mos Ema ho Defisiénsia (EhD) no feto vulneravel sira iha area rurál, hodi espresa mos sira nia direitu
Alende ne’e mós, ba organizasaun sira ne’ebé mak servisu iha sexual gender monitory inklui grupu LGBTI, tanba sira mós preokupa tebes oinsá mak bele tama iha prosesu eleisaun ne’e, espera katak ita hotu nia servisu oinsá mak bele tulun no akumula sira.
Oxfam fó apresiasaun ba FONGTIL ho nia membru sira nia servisu no inisiativa rasik, oinsá mak ita bele akompaña nafatin ho FONGTIL nia servisu durante kampaña eleitóral, tanba observasaun ne’e ita haree de’it, maibé monitorizasaun presija dadus hodi relata.
Iha fatin hanesan Diretor Ezekutivu Serviço de Apoio ao Sociedade Civil e Auditório Social (SASCAS), Edvin Noronha hateten, SASCAS nia papél mak intermedial ba organizasaun sosiedade sivil iha Timor-Leste liga ba asuntus sira ne’ebé sosiedade sívil presija haree.
“SASCAS intermedial de’it, durante organizasaun sosiedade sivil sira ne’ebé halo deskobrementu durante prosesu períodu kampaña no eleisaun. SASCAS nafatin akompaña organizasaun sosiedade sivil no espera katak imi kontribui maka’as liu tan ba STAE no CNE oinsá eleisaun parlamentár ne’e bele sai eleisaun ne’ebé transparénsia no demokrátiku,” Diretór Ezekutivu SASCAS dehan liu hosi nia diskursu iha Salaun FONGTIL, Kaikoli, tersa-feira, 18/04.
Diretór SASCAS hateten, Eleisaun Parlamentár ne’e rekursu ikus ba ema hotu hodi envolve ema iha prosesu demokrátiku ida ne’e, espera katak nasaun Timor-Leste nasaun ne’ebé mais joven, nune’e husu ba ita hotu kontribui ba eleisaun hodi fó valores ba prestasaun demokrátiku nian iha mundu internasionál.
“Ita orgullu tanba estadu konsiente katak iha prosesu konstrusaun, dezenvolvimentu ne’e presija envolve ema hotu ho nune’e mak partisipasaun sosiedade sivil ne’e importante i oinsá ita halo advokasia ba asuntu estratéjiku estadu nian hodi envolve ema hotu iha laran, tanba ne’e mak mai hosi povu, sei fila ba povu”, Nia dehan.
Nia konklui katak SASCAS prontu nafatin intermedial ba prosesu kampaña eleitorál, tanba iha fatin lubuk ida ema balun sedauk iha kartaun eleitorál oinsá mak sira bele tuir vota, liu-liu ba votante foun sira iha área remotas.
