Reportajen Adroaldo “Saretukau”
Iha kampaña eleitoral Partidu Os Verdes de Timor, ho númeru sorteiu 6, iha Munisípiu Díli, Prezidente Antonio Lelahunu Cruz, afirma katak bainhira povu tomak fo fiar ba partidu Os Verdes hetan kadeira iha Parlamentu Nasional sei propoin halo transformasaun ba sidade Dili no halo reforma radikal ba estatutu rai, hodi fo biban ema hotu-hotu sente na’in ba rai.
“Iha sidade, bus sira nia treminal laiha kondisaun, bus sira para arbiru de’it, inan aman sira fa’an iha dalan ninin, tanba sidauk halo jestaun di-di’ak ba sidade Dili. Verdes hakarak halo transformasaun radikal ba sidade Dili, ba sistema burokrasia iha ita nia estadu ida ne’e,” dehan Lelahuno, iha kampaña ne’ebé halo iha Kampu Habibie, Dili, Domingu, 23/04.
Prezidente Antonio Lelahuno hatete, to’o agora populasaun balu seidauk iha estatutu ba sira ne’e, se ema ida nia rai laiha sertifikadu oinsá mak atu halo fatin ba sira nia negósiu, tanba ne’e mak Verdes propoin halo reforma agrária total ba rai hodi fo na’in ba rai ba Timor-oan tomak.
“Imi aseita ka lae ita halo reforma, se ita la reforma ida ne’e labele, imi joven sira ne’e kaben iha uma ona ka lae, tanba saída seidauk, tanba governu seidauk iha polítika ba joven sira ne’ebé hola feto. Ho ida ne’e Os Verdes hakarak propoin prioridade ida ne’e, bainhira povu fo fiar ba kaer, ema sente katak nia na’in duni ba rai ida ne’e,” Nia dehan.
Prezidente PVT hatete, ida ne’e partidu ida mesak labele, maibé Verdes hakarak propoin partidu hotu iha laran, hodi bele rezolve ida ne’e.
