Reportajen Silvino Freitas
Juventude sira fó sira nia esperansa ba IX Governu ne’ebé mai atu investe makaas iha setór produtivu sira hanesan turizmu, agrikultura no industria ki’ik, hodi redús númeru dezempregu ne’ebé aumenta kada tinan, no hamenus lori timoroan sira ba servisu iha estranjeiru.
Joven Eduarda dos Santos Belo husi Partidu Republikanu (PR) ho nia esperansa katak, governu foun presiza tau atensaun ba polítika publika ne’ebé promete iha kampaña eleitorál, tenke implementa iha ukun, nune’e bele hamenus dezempregu hodi reduz timoroan sira ne’ebé buka moris iha estranjeiru tanba iha Timor Leste iha poténsia ne’ebé barak no presiza explora duni hodi emprega timoroan sira.
“Hanesan notísia balun ne’ebé fó sai ha’u seidauk verfika didi’ak katak, ema Xina mós tama ona ba servisu iha agrikultor karik ne’e tebes duni, oportunidade ba timoroan ne’e bainhira tan” Eduarda hato’o lamentasaun ne’e iha eis-otél Lecidere, (22/04).
Nia salienta tan, Ema estranjeiru mai investe ona iha agrikultura, neneik sira bele domina, nune’e governu foun presiza kria polítika ne’ebé diak, hodi loke kampu servisu ne’ebé barak atu emprega timoroan sira bele hola parte iha prosesu dezenvolvimentu Timor Leste nian.
Joven Olimpio Texeira Ximenes hateten, tuir observasaun ne’ebé nia halo dadaun ne’e Timor Leste infrenta situasaun dezempregu, maski dadaun ne’e governu hala’o maneira oioin hodi reduz dezempregu nune’e haruka joven sira ba servisu iha Korea no Australia no joven balun mós ho inisiativa rasik ba buka servisu iha Europa.
“Maibé ha’u mós triste ba estadu Timor ne’ebé la dezenvolve seitor produtivu sira hanesan turizmu no agrikultura nian, tanba ne’e XIV governu ne’ebé mai presiza dezenvolve seitor sira ne’e” dehan Olimpio iha kampus UNTL, (25/04).
Nia rekomenda tan, governu foun ne’ebé mai tenke dezenvolve no intensifika seitor produtivu sira hanesan turizmu no agrikultura ho di’ak liu, nune’e timoroan sira bele servisu iha nia rain rasik, hodi labele lori tan timoroan sira ba servisu iha estranjéiru.
Joven Milena Sarmento husi grupu Youth Empowerment for Future dehan, governo foun tenke mai ona ho plano polítika publika ne’ebé di’ak hodi reduz númeru dezempregu iha Timor Leste, nune’e tenke investe makaas iha area produtivo sira hanesan agricultura, turizmu no industria kiik sira, seitor produtivo sira ne’e labele sai de’it hanesan polítika retorika maibé governo foun tenke ho asaun ruma atu konkretiza ba joven Timor Leste, katak husi seitor sira ne’e maka bele kria kampu traballu ba Timoroan sira nomós halo redusaun ba dezempregu iha Timor Leste.
“Timor Leste dadaun ne’e infrenta hela número dezempregu ne’ebé aumenta kada tinan tanba de’it governu nia política ba seitor produtivo sira hanesan deit retorika ka liafuan mamuk laiha asaun ruma” Milena lamenta.
Joven Difisiénte Matan Geraldo do Carmo Carvalho hateten, governu seida’uk harii kampu traballu ne’ebé di’ak ba timoroan, nune’e governu foun prezisa kria kondisaun ne’ebé di’ak no dignu nune’e reduz dezempregu iha Timor Leste.
“Setór agrikultura governu seida’uk investe ho di’ak, tanba ne’e ita nafatin depedensia ba importasaun husi estranjéiru hanesan foos no seluk tan, governu mós seida’uk kria kampu traballu di’ak tanba ne’e joven sira nafatin ba servisu iha estranjéiru” dehan Geraldo iha FASPOL UNTL, (24/04).
