Reportajen Joselina dos Santos
Sekretaria Estadu ba Igualdade no Inkluzaun (SEII), realiza Konferénsia Imprensa kona-ba Loron Nasionál Feto Timor-Leste ne’ebe durante ne’e konsidera hanesan Loron Komemorativu, ne’ebe daudaun ne’e Prezidente Republika, Dr. Jóse Ramos Horta promulga ona hanesan loron feriadu Nasionál, no mos loron Ema ho Defisiénsia hanesan loron komemorativu.
Liuhosi Konferénsia Imprensa, Sekretaria Estadu ba Igualdade no Inkluzaun (SEII), Maria do Rosário Fátima Correia hatete, SEII hanesan órgaun sentrál Governu nian ne’ebé ho papél atu implementa, koordena, ezekuta no avalia polítika ba apoiu no promosaun igualdade no inkluzaun sosiál, hodi halakon diskriminasaun no violénsia oioin hasoru feto, labarik-feto, no grupu risku sira, hakbiit feto iha setór ekonomia no mós hasa’e partisipasaun feto iha polítika no foti-desizaun iha nível hotu, tantu nasionál, munisipál no lokál .
“Ho papel hirak-ne’ebe atribui ba iha SEII, instituisaun ne’e konsege ona atinje buat balun iha Governu Konstitusionál dawalu nian. Ohin Loraik ida-ne’e, Ita hasoru malu fali ho ha’u iha Konferensia Imprensa, ho Objetivu atu partilla kona-ba mudansa ba iha Loron Feriadu Nasionál no Loron Komemorativa Ofisiál Timor-Leste nian, liuliu ba iha Loron Nasionál Feto Timor-Leste no Loron Ema ho Defisiensia ne’ebé sei komemora kada tinan”, dehan, Sekretaria SEII Maria do Rosário Fátima Correia, liuhosi Konfénsia Imprensa iha Salaun SEII Kaikoli, kinta 04/05.
SEII halo Advokasia ho GMPTL no Komisaun F Parlamentu Nasionál hodi enkaisa proposta rezolusaun rua mak hanesan, Loron 3 Fulan Novembru nu’udar loron Nasionál Feto Komemorativa, hodi sai Loron Feriadu nasionál hodi valoriza no fó onra ba partisipasaun feto iha luta ba ukun rasik- an. Proposta Rezolusaun daruak mak atu konsidera loron 4 Fulan Jullu hanesan loron komemorativu ba Ema ho Defisiensia .
“Razaun tanba Timor-Leste ratifika ona Konvensaun Ema ho Defisiensia liuhusi Rezolusaun Parlamentu Nasionál Nú. 29/2022, loron 20 fulan Jullu. Liuhosi advokasia no esforsu ne’ebé ita hotu halo, Parlamentu Nasionál Aprova hodi halo alterasaun ba Lei Nú. 10/2005 ba iha Lei Nú.10/2023, Loron 5 Fulan Abril, iha artigu 2 kona-ba Feriadu Nasionál iha alinea h), hodi konsidera ona Loron Nasionál Feto (3 Novembru) ba iha Loron Feriadu Nasionál ne’ebé durante ne’e hanesan loron ofisiál Komemorativa”, nia informa.
Governante ne’e hatutan, Parlamentu Nasionál mós aprova ona loron 4 Fulan Jullu hanesan loron Komemorativa ofisiál ba iha Ema ho Defisiensia liuhusi Lei Nú.10/2023, Loron 5 Fulan Abril, iha artigu 5 Kona-ba Data Ofisiál Komemorativa iha alinea b). Lei Nú. 10/2023, Loron 5 Fulan Abril promulga ona hosi Prezidente da Repúblika, José Ramos Horta iha loron 3 Fulan Abril 2023 no Públika ona iha Buletim Ofisiál Jornál da Repúblika.
