Reportajen Joselina dos Santos
Estadus Unidus America (EUA), liuhusi USAID hamutuk ho Prezidente Repúblika, no Forum Organizasaun Naun-Governamental Timor-Leste (FONGTIL), apoiu sosiedade sivíl Rede ba Saúde Timor-Leste (REBAS-TL), hodi selebra aniversáriu REBAS-TL ba dahuluk, hodi mellora rezultadu saúde ba povu Timor-Leste liuhusi reforsa sira-nia koñesimentu, kompeténsia no abilidade hodi halo advokasia ba solusaun hirak-ne’ebé bazeia ba evidénsias.
“Ha’u kontente tebes ohin mai hamutuk ho ita-boot sira, eventu ida-ne’e marka atinjimentu importante ida husi Estadus Unidus Amérika nia esforsu-sira liuhusi parseria ho Timor-Leste hodi hadia’ak liután envolvimentu no advokasia sívika iha sistema saúde”, dehan, Enkaregadu Negósiu Embaixada Amerika, Tom Daley iha aniversariu dahuluk Rede Ba Saude Timor-Leste, (REBAS-TL), Iha Salaun Hotel Timor, sexta 05/05.
Nia haktuir, liuhusi USAID nia Atividade Sustentabilidade Sistema Saúde, Estadus Unidus Amérika apoia dadaun sosiedade sivíl hodi mellora rezultadu saúde ba povu Timor-Leste liuhusi reforsa sira-nia koñesimentu, kompeténsia no abilidade hodi halo advokasia ba solusaun hirak-ne’ebé bazeia ba evidénsias. Sosiedade sivíl iha papél importante tebes hodi hametin sistema saúde no hari’i Timor-Leste ida-ne’ebé saudável, inkluzivu no prósperu liután.
“Estadus Unidus Amérika sente orgullu fó apoiu ba ita-boot sira-nia esforsus enkuantu ita kontinua hakle’an liután ami-nia parseria ho Timor-Leste no investe iha povu Timor-Leste. Ha’u hakarak hato’o ha’u-nia agradesimentu ba Fongtil no ninia ekipa. Ha’u aplaude ita-boot sira-nia servisu hodi halibur organizasaun sosiedade sivíl saúde hamutuk haat nulu-resin-tolu hodi hari’i Rede ba Saude Timor-Leste, rede advokasia saúde ba dahuluk iha nasaun ne’e,” nia salenta.
USAID hato’o parabens ba Koordenadór REBAS-Timor-Leste, parseiru sosiedade sivíl-sira, no sira hotu ne’ebé envolve iha REBAS-TL. Parabéns ba buat hotu ne’ebé ita-boot sira alkansa tiha ona iha tinan dahuluk hala’o servisu ida-ne’e. Espera katak ita-boot sira kontinua hetan susesu, no sei realiza hodi hari’i sistema saúde ida-ne’ebé forte liután ba povu Timor-Leste iha tinan hirak oin mai.
Koordenadór REBAS-TL Joaquim Soares hateten, REBAS-TL harii husi organizasaun Sosiedade Sivil hamutuk 43 ne’ebe estabelese iha loron 05 fulan Maiu 2022 hodi estabelese tanba nu’udar loron istoriku luta ba libertasaun Nasionál ohin kompleta tinan ida, atu iha sistema saude ho kualidade no inkluziva hodi atinje povu nia moris saudável ho nia misaun dezenvolve Rede organizasaun sub kualifikadu no ativa reprezenta povu nia nesesidade no prioridade ba entidade sira ne’ebe halo desizaun kona-ba polítika saúde.
