Reportajen David da Costa
Prezidente Partidu Frente Revolucionário Timor-Leste Independente (FRETILIN), hakarak fila ba ukun iha tinan lima tan, atu hadi’a setór edukasaun, setór Saude, no infraestrutura iha Timor-Leste, tanba ne’e FRETILIN husu ba militante sira atu vota ba partidu FRETILIN hodi bele hadi’a problema sira ne’e.
Prezidente Partidu Frente Revolucionário Timor-Leste Independente (FRETILIN), Francisco Guterres Lu-Olo, hateten, tinan 20 ona Timor-Leste ukun-an maibé povu sei halerik ba iha setór edukasaun, saude, infraestrutura, dezenvolvimentu no povu barak maka sei moris iha kiak no mukit nia laran. Maske buat barak halo ona iha tinan 20 nia laran, maibé haree povu barak sei moris iha mukit no kiak nafatin, siginifika buat barak maka halo la los iha Timor-Leste, tanba ne’e presiza kurizi no hadi’a ida ne’e.
“FRETILIN hanoin povu ida ne’e nia oan presiza matenek, entaun FRETIILIN prioritiza edukasaun ida-ke importante tebe-tebes ba ita nia oan sira, tanba ne’e FRETILIN nia kompromisu boot tebe-tebes maka atu fó kualidade ensinu ida ba ita nia oan sira, ba ita nia joven sira, para atu bele sai matenek liu tan aban bairua bele kaer ukun ida ne’e ba oin, atu halo Timor-Leste sai buras liu tan. edukasaun husi kiik to’o iha universidade presiza hadi’a. Ita nia professores presiza iha kondisoens, para atu hanorin ita nia oan sira ho diak, infraestrutura eskola presiza hadi’a,prezia iha bibloteka, para ita nia oan sir abele lori livru ba estudu no foti referensia barak hodi haklean sira nia koñesimentu,” dehan prezidente partidu FRETILIN, Francisco Guterres Lu-Olo, bainhira halo komísiu kampaña iha Tasi tolu, tersa 16/05.
Nia haktuir, FRETILIN mós iha hanoin para atu hadi’a povu nia saude, tanba FRETILIN kompromete atu servisu ho povu ida ne’e hodi hadi’a saude diak liu tan, iha tinan lima nia laran bainhira FRETILIN fila fali ba ukun. FRETILIN mos hatene presiza hadi’a dalan para povu bele lao ho diak, FRETILIN iha kompromisu boot ba iha ida ne’e.
Tanba ne’e, atu liberta povu husi kiak ho mukit, presiza iha programa ida-ke klaru, para atu hato’o ba povu ida ne’e, ho ida ne’e FRETILIN mai hato’o nia programa no se maka kaer ikun ida ne’e presiza respeitu povu.
“FRETILIN maka liberta Timor-Leste, agora ita liberta tan ita nia povu, atu nune’e ita nia povu moris diak, maibé antes atu moris diak nian, é presizu ita hametin diak liu tan ita nia estadu direitu demokratiku ida ne’e. tanba estadu ne’e aas liu ema ida nia no partidu ida nian. Bainhira estadu metin ita bele dehan halo dezenvolvimentu diak ba ita nia rain no povu nia moris diak, se estadu maka moris iha konfuzaun nia laran, ita nia povu nia moris sei naksalak nafatin,” nia esplika.
Tenente Jenerál Reformadu, Lera Anan Timor, hateten, programa FRETILIN la’os foun, kuandu fretilin hahú funu, iha manual politiku Fretilin uluk nian, programa Fretilin nian maka ida ne’e liberta pataria, ida ne’e halo tiha ona, agora tenke buka lori moris diak ba ninia povu, ida ne’e maka objetivu Fretilin ninia.
Tanba ne’e, Lere Anan Timor, husu ba joven no inan aman sira, ida-idak fila ba ninia fatin, prepara-an ba iha dia 21 maiu, keta haluha vota ba FRETILIN, atu nune’e FRETILIN bele hadia povu ne’e nia moris.
