Reportajen David da Costa
Partidu Frente Revolucionáriu Timor-Leste Indepedente (FRETILIN) garante sei manan iha elisaun parlamentar tinan ida ne’e.
Prezidente Partidu Frente Revolucionáriu Timor-Leste Indepedente (FRETILIN), Francisco Guterres Lu-Olo hateten, iha elisaun ida ne’e, sente atu bele hametin estadu Timor-Leste no hari paz no estabilidade dezenvolvimentu ba iha nasaun Timor-Leste
“Ha’u nia sentimentu para hametin estadu Timor-leste ninian, bele harri ita nia nasaun, atu hari paz no estabilidade dezenvolvimentu ba ita nian rain ida ne’e,” dehan Prezidente FRETILIN Lu-Olo, iha sentru votasaun eskola Farol, domingo 21/05.
Nia hatutan, FRETILIN iha nia aliadus naturais ne’ebé asina plataforma ida ou akordu pre-eleitoral ho partidu PLP ho KHUNTO. FRETILIN hakarak paz no estabilidade bele hametin diak liu tan ou bele halo boot liu tan atu garante dezenvolvimentu. Nia fiar plataforma ne’e garante tanba asina tiha ona akordu ida atu hametin nafatin.
Iha fatin hanesan Sekretáriu Jerál FRETILIN, Dr. Mari Alkatiri afirma katak FRETILIN sei manan, bainhira manan signifika povu mak mana.
Dr. Mari Alkatiri hateten asuntu importante ne’ebe mak presiza halo sekarik manan iha eleisaun ne’e mak kombate korrupsaun no tau atensaun ba setór importante sira. hodi dezenvolve diak liután mak hanesan edukasaun, saúde no seluktan.
Konaba plataforma Mari Alkatiri hateten FRETILIN, KHUNTO ho PLP harii ona plataforma hamutuk, no sekarik manan plataforma ne’e mak hamutuk hodi harii governu tuir mai.
