Reportajen Umbelina dos Reis
Gabinete Ministru Koordenador ba Asuntu Ekonómiku (MKAE) no Sekretáriu Estadu ba Igualdade no Inkluzaun (SEII) hamutuk ho Austrália nia Programa Parseria ba Prosperidade Inklusivu (PROSIVU), organiza workshop durante loron rua ho tema “Implementasaun komprímisu nasional ba empoderamentu ekonómiku feto” iha Timor-Leste ho objetivu atu promove no empodera ekonomia feto iha área rural.
Ministru Koordenadoor ba Asuntu Ekonómiku, Joaquim Amaral hateten, objetivu hosi workshop ne’e governu garante nia komprímisiu hodi promove no empodera feto iha vida ekonomia, importante tebes atu sensibiliza no promove asuntus empoderamentu ekonómiku feto, liu-liu feto iha área rural, tanba iha ona deklarasaun Maubise, halo planu asaun nasional entaun presija halo planu workshop hanesan ne’e hodi konsolida ideia ka rekursu, atu aselera komprímisiu no halo planeamentu ba orsamentu, nune’e tulun liu tan dezenvolvimentu konaba igualdade jeneru liu-liu ekonomia ba feto sira iha área rural.
“Tanba iha ministériu 16, deklarasaun Maubisse iha ona, presija whorkshop hanesan ne’e hodi ko’alia bei-beik ba malu, nune’e planu orsamentasaun ne’e nafatin sensivel ba jéneru no inkluzivu.” Dehan Ministru MKAE ba Jornalista sira iha Timor-Plaza, tersa-feira, 30/05.
Nia dehan, feto nia partisipasaun iha vida ekonomia sente di’ak ona maibé presija halo boot tan de’it, hanesan iha situasaun pandemia Covid-19 liu ba kuaze setor informal sira ne’e, ekonómia, informasoens rejiste no aguenta maibé barak liu autor sira ne’e feto.
“Entaun ekonomia ne’ebé feto sira halo ne’e informal, maibé presiju formaliza no grupu sira ne’ebé fo asisténsia ne’e presiju konsolida. Entaun governu liu hosi ministériu sira reuni bei-beik hodi hametin koordenasaun ho parseria hanesan governu Austrália prosivu, nune’e ajuda ita nia NGO no setor privadu sira.” Nia dehan.
Iha fatin hanesan Sekretária Estadu Igualdade no inkluzaun (SEII), Maria do Rosário Fátima Correia hatutan, iha deklarasaun Maubise hamutuk 16 mak responsabiliza atu implementa ba ekonomia hodi halo dezenvolvimentu.
“Ha’u hare partisipasaun feto iha vida ekonomia maioria barak ona, maibé seidauk hare persentajen, tanba ami haree ba dadus ne’ebé mak iha, feto iha entoziouza atu parsipa iha vida ekonomia hanesan grupu ida ne’ebé mak sussesu iha Munisípiu Aileu, sira iha grupu benefisiáriu maibé sira tranfoma sira nia aan ba iha koperativa hamutuk 156 grupu, entaun ita hare kada tinan feto sira iha ona inisiativa no kreatividade rasik hodi halo sira nia negósiu.” Dehan Sekretária Estadu SEII, Maria do Rosário Fatima.
Nia dehan, durante ne’e mos Primeiru Ministru deside tanba ita hare kazu violénsia doméstiku númeru aas tebes iha rai ne’e, entaun fó mos espasu ba feto atu hasa’e sira nia rendimentu ba vida ekonomia.
“SEII deside atu fo fundus trasparénsia públiku ho mekanizmu rotativa ba iha grupu benifisiáriu sira iha teritóriu Timor laran tomak, hosi grupu feto hamutuk 398, no grupu mane 500 ital maibé maioria feto mak barak liu, inklui grupu vulnerável sira hanesan Ema ho Defisiénsia (EhD) hamutuk 42.”
Nia konklui, sira la’os halo mekanizmu rotativa maibé sira fo $1000 dolares hodi halo sira nia negósiu rasik, rotativa ne’e bainhira iha dentru tinan rua nia laran sira hetan ona lukru entaun orsamentasaun inan ne’e fo fali ba grupu benifisiáriu ne’ebé mak seidauk hetan oportunidade.
