Reportajen Silvino Freitas
Hali ba Dame (HABADA) konsidera nomeisaun komisariu jeral ho segundu komisariu jeral Polisia Nasional Timor Leste (PNTL) neebe Ministeriu Interior aprezenta ona pakote rua neebe kandidatu maibe kandidatu ba nomeisaun nee mai husi fali situasaun apozentasaun, neebe sei hamosu polemika no publiku sei kastiona legalidade no lejitimidade nunee mos sei hamosu kestaun legal no funsional neebe kompleksu liu tan.
Diretor Ezekutivu HABADA Abel Amaral dehan, IX Governu Konstitusional liuhusi Ministeriu Interior aprezenta ona kandidatu ho pakote kandidatura rua maka Pakote 1 Komandante-Jeral Superintendente-Xefe Afonso dos Santos ho Segundu Komandante-Jeral: Superintendente-Xefe Justino Menezes no Pakote 2 Komandante-Jeral Superintendente-Xefe Jorge Monteiro ho Segundu Komandante-Jeral: Superintendente-Xefe Orlando Gomes, nunee tuir enkuadramentu legal ne’ebe aplika ba nomeasaun kargu aas liu iha PNTL klaru no la husik fatin ba interpretasaun ne’ebe luan.
“Lejislador estabelese kritériu objetivu sira bazeia ba ierarkia no dalan kareira ofisial polisia sira-nian, hanesan deskreve iha artigu 38 to’o 48 hosi Dekretu-Lei N.º 35/2024, loron 18 Outubru Rekizitu ba kargu Komandante-Jeral (Artigu 47.9) Artigu 47. hosi Dekretu-Lei N.35/2024 estabelese ho maneira definitiva, sé maka bele hetan nomeasaun nu’udar Komandante-Jeral: N.º 2: Nomeasaun ba Komandante-Jeral monu ba ofisial polisia sira ho postu Komisáriu-Jeral ka Komisáriu, N.° 3: Nomeasaun ba Komandante-Jeral bele mós monu ba ofisial polisia sira ho postu Komisariu-Asistente” esplika Diretor Ezekutivu HABADA Abel Amaral iha ninia knaar fatin Golgota Komoro, (17/03).
Nia dehan tan, nomeasaun ba kargu Komandante-Jeral nían rezerva liuliu ba ofisiais sira ne’ebe ho postu sira Komisáriu-Jeral ka Komisaríu, lei permite nomeasaun ne’e monu ba ofisiais sira ne’ebe ho postu Komisáriu-Asistente, nune’e la admite mos ba kategoria ka postu síra ne’ebe ki’ik liu ofisiais superiors, nunee husi aprezentasaun governu nian tuir ierarkia ne’ebe define iha Artigu 39 hosi Dekretu-Lei N.º 35/2024, inklui tha subkategoria “Ofisial Superior sira”, iha subkategoria “Ofisial Dirijente sira” nia okos, Katak ofisiais ne’ebe sei nomeia ba kargu Komandante-Jeral tenki maihosi Ofisiais Dirijente sira ho postu Komisáriu-Jeral sira, Komisárlu sira no Komisariu Asistente sira, nune’e karik nomeia Superintendente-Xefe ida ba kargu Komandante-Jeral, ne’e konstitui violasaun klaru no direta ba provizaun sira iha Artigu 47.° Estatutu Polisia PNTL nían.
“Artigu 48 estabelese rekizitu sira ba nomeasaun kargu Segundu Komandante-Jeral N.° 2: “Nomeasaun ba 2. Komandante-Jeral monu ba ofisial polisia sira ho postu Komisáriu ka ofisial polisia sira ho postu Komísáriu Asistente, N.° 3: “Nomeasaun ba 2. Komandante-Jeral bele mós monu ba ofisial polisia sira ho postu Superintendente-Xefe” esplika Abel.
Nia dehan tan, husi sira nia observasaun ofisiais dirijente no superior sira iha PNTL nia laran balu pasa ona ba situasaun apozentasaun (artigu 65. Dekretu-Lei N.º 35/2024), maibe karik nomeia ba kargu Komandante-Jeral no 2.° Komandante-Jeral PNTL nian sei hamosu polémika no públiku kestiona kona-ba legalidade no lejitimidade hodi nomeia ofisial reformadu ida ba pozisaun komandu aas liu iha PNTL, hodi hamosu dúvida sériu kona-ba ninia kapasidade legal no funsional atu hala’o fali knaar ativu sira ho natureza no responsabilidade ida-ne’e, tanba nee bainhira membru ka ofisiais PNTL ida tama ona ba situasaun apozentasaun implika terminasaun ligasaun funsional ativu ho PNTL.
“Nomeasaun ofisial ida ho postu Superintendente-Xefe ba pozisaun Komandante-Jeral konstitui violasaun klaru, diretu, no inaseitavel ba Artigu 47. Dekretu-Lei N. 35/2024 Estatutu Polisia PNTL nian, aumenta ho senáriu seluk, nomeasaun ofisial superior ida ne’ebe tama ona ba situasaun apozentasaun ba sei hamosu kestaun legal no funsional sira ne’ebe kompleksu liutan, tanba nee Primeiru-Ministru no Ministru Interior tenke avalia ho rigor pakote kandidatu sira ne’ebe sei nomeia ba Komandante-Jeral no 2.° Komandante-Jeral PNTL nian, hodi garante katak futuru lideransa PNTL nian hili entre ofisial sira ho postu ne’ebe legalmente ezije: Komandatente-Jeral nomeia hosi ofisials sira ho postu Komisáriu-Jeral, Komisáriu ka Komisáriu-Asistente. Nomós 2.° Komandante-Jeral nomeia hosi ofisiaís ho postu Komisáriu, Komisariu-Asistente ka Superintendente-Xefe” konklui Diretor Ezekutivu HABADA Abel Amaral.
