Reportajen Joselina dos Santos
Asosiasaun Jornalista Timor Lorosa’e (AJTL) serbisu hamutuk ho Oxfam iha Timor-Leste hodi lansa Bulletin Media Tour ne’ebe foka ba Justisa Klimatika, oinsa komunidade sira halo reziliente hodi hasoru Mudansa klimátika. Iha abertura ne’e Provedor Direitu Umanus no Justisa, Virgilio da Silva Guterres hateten hateten PDHJ nia serbisu foka liu ba direitu umanus, nune relasiona ho asuntu klimátika, iha Konvensaun Internasional konstitui konaba meiu ambiente no justisa klimatika
“Sidadaun sé deit iha direitu atu asesu ba informasaun ne’ebe relasiona ho meiu ambiente no klima nian, iha tinan ida liu ba ita rona katak joven nain-rua ba Ramelau hodi vizita Nain Feto, maibé liu tiha semana rua mak foin hetan, ida ne’e karik akontese iha rai seluk estadu tenke selu nia prejuizu ba sidadaun sira, tanba iha fatin publiku estadu la fornese informasaun natoon ba sidadaun sira kona-ba klima iha Ramelau nian”, dehan, Provedór “Lamukan” iha nia diskursu, iha edifisiu Oxfam Hudi Laran, Segundo 12/06
Nune’e provedór iha nia monitorizasaun halo komunikasaun ho Ministériu relevante hanesan Turizmu, Floresta no Seguransa Sivíl, nune’e sidadaun sira bele hetan informasaun kona-ba mudansa klimátika. Agrikultor sira presiza asesu informasaun konaba impaktu husi lalina no lanina ne’ebe bele akontese tanba mudansa klimatika ne’ebe akontese
Nia haktuir direitu ba partisipasaun iha desizaun polítika saida deit, mak governu ka entidade halo kona-ba meiu ambiente, projetu sira atu halo estrada. Direitu atu partisipa iha desizaun polítika sira, nune’e nia impaktu mosu mai karik ema hotu prontu halo mitigasaun no adaptasaun.
Nune’e mos Direitu asesu ba justisa klimátika, Provedor iha nia kompeténsia atu la’o hamutuk ho entidade sira seluk, hodi bele komunika nune bele garante direitu katak povu bele asesu informasaun natoon.
Nia dehan atividade media tour ne’e, atu bele garante direitu sidadaun nian, atu asesu informasaun, bele ajuda mos sai opsaun ne’ebe garante públiku, atu hetan informasaun konaba mudansa klimatika ne’ebe akontese.
PDHJ kongratula Oxfam iha Timor-Leste ho AJTL ne’ebe kontinua tau asuntu justisa klimatika, nune’e públiku bele asesu informasaun sira ne’ebe fo sai husi jornalista sira.
