Reportajen Joanina Casamiro
Asosiasaun Jornalista Timor Lorosa’e (AJTL) ho Oxfam iha Timor Leste lansa Bulletin Media Tour konaba Justisa Klimátika, ne’ebé jornalista sira hakerek bainhira sira partisipa iha atividade media tour ne’ebe halo iha Oe-cusse no Ermera.
Iha lansamentu ne’e Presidente AJTL, Zevonia Vieira hateten Oxfam servisu hamutuk ho AJTL hodi halo programa bolu naran media ativismu, ne’ebé liga liu ba justisa klimátika, kona-ba impaktu hosi mudansa klimátika ba komunidade sira.
“Nune liu hosi programa ne’e Oxfam kolabora ho AJTL, hodi halo programa ho naran Media Tour lori jornalista hamutuk 15 hosi Radiu Televisaun Timor-Leste, Jornal, Media Online sira, Radiu komunidade hodi halo estudu kazu iha Ermera no RAEOA, hodi identifika asuntu sira ne’ebé liga husi impaktu klimátika ba bee, tanba bee maran, dezastre naturais akontese no rai iha area rural halai”, Dehan Prezidente AJTL ba jornalista sira iha Oxfam, Hudi-laran, 12/06.
Nia hatutan, ida ne’e mos bele fasilita jornalista sira hodi ba buka informasaun sira iha area rural, hodi fo espasu ba komunidade iha area rural, hodi hato’o sira nia preokupasaun, tanba sira mos afeta ba mudansa klimatika ne’ebe akontese.
Media Tour ne’e rasik AJTL ho Oxfam hala’o ba dala tolu ona, ne’ebe foka ba asuntu importante sira mak hanesan Divirsifikasaun Ekonomia, agrikultura no Mudansa Klimatika.
“Ita espera katak tinan ida ne’e sei kontinua nafatin, tanba ida ne’e ajuda jornalista sira hodi bele ba área rural hodi identifika informasaun sira, lian kbiit laek sira ne’ebé ita la konsege hetan, nune’e sira nia lian ne’e bele to’o iha nivel nasionál, nune’e governu bele buka solusaun atu nune’e bele rezolve problema ne’ebé iha área rural hasoru liu ba feto, ema ho defisiénsia no labarik sira ne’ebé mak afeta maka’as liu ba problema sira, liu-liu agora ita hare kona-ba mudansa klimátika.” Dehan Zevonia.
Iha fatin hanesan Diretór Diresaun Relasaun Institusionál no Informasaun KI, Altino da Cruz Freitas, hateten Oxfam iha Timor-Leste hamutuk ho Asosiasaun Jornalista Timor Lorosa’e, liu hosi sira nia parseiru hamutuk, lansa bulletin media tour ne’ebé servisu hamutuk ho jornalista sira hodi rekolla informasaun sira relasiona ho impaktu alterasaun klimátika.
“Ohin ita halo lansamentu bulletin nune’e mos ho video badak sira no istória durante kolega jornalista sira halo iha terenu. Programa ne’e ho fundus ki’ik oan ho Oxfam internasional no iha Timor ami servisu hamutuk ho AJTL entaun jornalista sira ne’ebé ke faz parte iha asuntu ne’e iha AJTL nia okos, media lubuk ida hanesa Televizaun, Jornal, Radiu komunidade sira no media online sira sira halo media tour iha Ermera no Oecusse.” Dehan Nia.
Nia espera katak ida ne’e hanesan programa fini liu hosi programa natoon, Oxfam sei buka dalan atu bele kontinua servisu hamutuk ho AJTL no jornalista sira balu.
