Reportajen Silvino Freitas
Tuir Autoridade Protesaun Sivíl (APC) udan ne’ebé akontese durante loron 2 to’o 4 Jullu nian hodi rezulta uma-kain 274 afeta inundasaun iha munisípiu 9, no lori estudante nain 4 feto 3 ne’ebé konsege salva an, no mane 1 ne’ebé lakon to’o dadaun ne’e sei buka hela, maibé seeda’uk dehan katak lakon vida.
Nune’e mós impaktu husi mudánsa klimátika ne’e, halo estrada no ponte rurál sira hetan estragus, komunidade afetadu balun hetan ona apoiu emerjénsia, no sei hala’o verifikasaun ba komunidade sira.
Diretór Gabinete Relasaun Esterna no Komunikasaun-APC, Anacleto Caetano hateten, iha munisípiu Manufahi akontese udan hodi provoka mota bo’ot hodi halo ponte Avatu ligasaun same mai Dili kotu estraga totál iha suku Letefoho aldeia Raiubu nian, nune’e mós iha aldeia Lakalua Dotik akontese inundasaun afeta ba uma kain 2 no iha sulu umaberloik afeta ba uma kain 13 hodi evakua ba sede suku, nune’e iha munisípiu Covalima mós akontese inundasaun ne’ebé afeta ba família hamutuk 188 nomós ponte ne’ebé ligasaun Zumalai mai Dili mós kotu.
“Iha Maucatar suku oges afeta ba uma kain 3 no uma-lisan 2 suku beco mós inundasaun maka aas afeta ba komunidade nia uma lain 102 no totál uma kain afeta ba inundasaun iha Covalima hamutuk 188” dehan Caetano lihusi konferénsia imprensa iha APC Kaikoli, (05/07).
Nia dehan, iha munisípiu Ainaro mós akontese inundasaun hodi afeta ba uma-kain 17 inklui mós estraga irigasaun natan no kolam ikan nian, nune’e iha Lautem mós akontese mota bo’ot hodi lori estudante feto 3 no mane 1 ne’ebé akur mota suru-uaku nune’e feto konsege salba an maibé estudante mane ho naran joanico da costa ho idade 17 lakon to’o dadaun ne’e sei buka tuir hela maibé seidauk bele dehan katak nia lakon vida nomós afeta ba ponte balun ne’ebé ameasa kotu no balun motu, udan ne’ebé ho intensidade maka aas afeta mós ba komunidade nia plantasaun toos iha munisípiu Manatuto Natarbora, inklui mós erozaun ne’ebé afeta ba uma-kain 1, no mós inundasaun durante ne’e afeta mós ba uma-kain 4 iha munisípiu Ermera nian.
“Iha munisípiu Baucau mós akontese iha suku bualale no guruca nune’e totál afetadu iha Baucau hamutuk 2, akontese udan bo’ot ne’e mós halo ponte sumato ne’ebé liga Vikeke no lakluta mós hetan estragus, nune’e iha Bobonaro akontese iha suku Lour aldeia Olo-olo ne’ebé halo rai halai afeta ba uma-kain 46” dehan Diretór Caetano.
Nia dehan, vitíma sira ne’ebé afeta no evakua ona hetan ona apoiu emerjénsia nomós iha nasionál hahú ona distribui materiál apoiu nian nune’e bele reforsa stock sira ne’ebé menus iha munisípiu sira atu bele apoiu ba vitíma sira, tanba iha munisípiu balun stock balun la kompletu nune’e mós iha terenu nafatin hala’o verifikasaun ba vitíma atu bele apoiu emerjénsia ba sira, nune’e sei iha verifikasaun foun atu bele haree sira tama iha kategoria foun ba rekooperasaun nian.
