Reportajen Filomena da Conceição
Udan boot ne’ebé maka akontese iha loron Domingu meiudia to’o segundu iha segunda kalan ne’e estraga tiha komunidade nia uma tolu iha Aldeia Lialura, Suku Bualale, Postu Administativu Quelicai Munsipiu Baucau, no dadun ne’e komunidade sira hela iha familia no viziñu nia uma.
Xefe Suku Bualale, Gabriela Belo da Conceição hateten, udan bo’ot ne’ebé akontese hahú husi loron domingu to’o segunda kalan rezulta komunidade nia uma tolu mak hetan estragus, inklui mós ho komunidade sira nia plantasaun sira.
“Udan komesa iha loron domingo, meudia maisumenus iha tuku 12, to’o iha segunda kalan tuku 8hanesan ne’e, komunidade iha Aldeia Lialura, Suku Bualale nia uma tolu maka hetan estragus no uma ida komunidade hela ona, uma ida foin mak halo reabilitasaun no uma UKL ida, no uma hirak ne’e hetan estragus tanba impaktu husi reabilitasaun estrada ne’ebé dadaun ne’e lao hela,” dehan Xefe Suku Bualale, Gabriela Belo ba jornalista Neometin husi via Telefone, Kuarta 5/07.
Nia haktuir, haree komunidade sira nia uma hetan estragus tiha hanesan ne’e, sente triste, maibé labele halo buat ida tanba ida ne’e naturalmente sempre akontese iha kada tinan. No vitima dezastre naturais sira ne’e seidauk hetan apoiu ruma husi parte relavantes sira.
Tanba ne’e, vitima dezastre naturais sira ne’e presiza tebes ajuda urgentemente husi parte governu atu tau matan, tanba dadaun ne’e sira hela de’it iha família ho viziñu sira nia uma.
“Ha’u husu ba governu oinsá ita bele hamutuk atu bele asegura fali komunidade sira, atu sira hetan fali fatin diak hodi hela ba, tanba vítima sira presiza ajuda urgentemente husi governu atu tau matan tanba sira agora de’it iha viziñu no família sira nia uma,’ nia husu ba governu.
Entretantu, udan ne’ebé akontese iha postu Administrativu Quelicai, Munisipiu Baucau, estraga komunidade sira uma hela fatin ida, uma ne’ebé foin mak atu konstrusaun ida, no uma naroman ba povu (UKL) ida, Aliende ne’e impaktu husi udan refere mós estraga komunidade sira-nia plantasaun barak hanesan hudi, ai-farina, talas tanba akontese husi rai halai.
