Reportajen Umbelina dos Reis
Ministru Estadu Negósiu Estranjeiru Japaun, TAKEI Shunsuke hala’o sorumutuk bilateral ho Ministru Negósius Estranjeirus no Kooperasaun (MNEK), Bendito do Santos Freitas hodi ko’alia konaba reforsa kooperasaun bilateral entre Japaun no Timor-Leste.
Iha enkontru ne’e Governu Japaun iha komitmentu fo apoiu formasaun téknika ba Timor oan sira, inklui forsa defeza ne’ebé tuir formasaun iha Japaun, apoiu ba dezenvolvimentu infraestrutura, agrikultura , edukasaun no saúde.
Ministru Negósiu Estranjeiru no Kooperasaun (MNEK), Bendito do Santos Freitas hateten, Ministru Japaun mai vizita Timor-Leste ho objetivu ofisial atu mai felisita governu foun no haforsa kooperasaun bilateral entre Timor-Leste no Japaun.
“Durante restaurasaun independénsia Timor-Leste, nu’udar estadu soberanu independente komesa hosi tinan 2002 to’o mai agora, Japaun kontinua fo kontribuisaun ba ekonomika finanseira ne’e, signifika to’o agora Japaun kontinua apoiu halo dezenvolvimentu ba Timor-Leste ho fundus $315 miloens, apoiu ba asisténsia téknika mais menus $120 miloens, no apoiu enprestimus ba halo konstrusaun ba aeroportu Internasional Prezidente Nicolau Lobato Comoro $40 milõens,” dehan Ministru Negósiu Estranjeiru Kooperasaun, Bendito do Santos Freitas, ba Jornalista sira iha edifísiu MNEK Pantai Kelapa, kinta-feira, 06/07
Nia informa, prezensa hosi Ministru Japaun, atu halo kooperasaun liu hosi estadu ne’e importante tebes, atu reafirma no apoiu estadu Timor-Leste, governu Japaun kontinua fo apoiu formasaun teknika ba joven Timor oan sira, inklui forsa defeza ne’ebé hetan formasaun durante iha Japaun, servisu moos ba meius komunikasaun sosiál hanesan setór infraestrutura, agrikultura, edukasaun, saúde, inklui moos halo reabilitasaun aeroportu Internasionál Prezidente Nicolau Lobato Comoro.
Nia dehan kompromisu hosi governu Japaun ne’e forte tebes apoiu estadu Timor ba dezenvolvimentu, promove direitu demokrátiku, respeita direitu umanus hodi espresa no sai modelnu diak ba nasaun seluk, nune’e sai parseiru estratéjiku ba diálogu ASEAN nian
