Reportajen Umbelina dos Reis
Estudante Departamentu Peskas i Siénsia Mariña, Fakuldade Agrikultura, UNTL, Armenia Gaio Alves Pereira hateten, programa ne’ebé APFTL realiza ne’e di’ak tebes ba juventude sira inklui komunidade, tanba liu hosi atividade kuda ai-parapa oan ne’e bele fó benefisiu ba joven no estudante sira hodi aprende konaba natureza no mudansa klimátika iha rai laran.
“Hanesan joven ida la presiza halo asaun ne’ebé mak tenki boot, maibé hatudu ezemplu ki’ik liu hosi área kosteira, labele tesi ai arbiru, labele estraga du’ut sira ne’ebé moris iha tasi ninin, inklui labele soe fo’er arbiru iha tasi ninin, nune’e ambiente saudável nafatin ba ema hotu.” Dehan Estudante Armenia Gaio, ba Jornalista sira, iha Metinaru, sábadu, 05/08.
Nu’udar joven tenki hadomi natureza nune’e ambiente furak nafatin iha mundu, nune’e joven, labarik, komunidade bele moris iha ambiente ne’ebé mak saudável.
Iha fatin hanesan Juventude Hadomi Natureza (JHN) Romario Amaral hateten, programa ba konservasaun ambiental kuda ai-parapa oan no inklui kuda ai-oan seluk ne’e importante. Kada tinan sempre hala’o, nune’e hanesan Juventude Hadomi Natureza (JHN), tenki kuidadu nafatin ambiente liu hosi kuda ai-parapa oan hodi proteje ba ambiente saudável iha futuru.
“Ha’u sente hahú agora ba oin juventude no komunidade tenki tau prioridade ba floresta ambiental, tanba Timor hakarak rai matak no furak iha futuru presiza ita hotu nia konsiénsia ba kuida natureza iha ita nia rai rasik. dala-barak komunidade no joven balun tesi ai arbiru maibé, bainhira tesi ona hun ida, presiza kuda fila fali hun ida, nune’e proteje nafatin ba ambiente saudável.” Nia dehan.
Nia konklui, importánsia hosi ai bele fó mahon ba ema hotu, proteje rai labele monu, hamatak no haburas nafatin rai, dala barak rai monu tanba ai-oan laiha, entaun presiza ita hotu nia konsiénsia hodi kuida di’ak natureza.
Aktividade kuda ai-parapa oan ne’e iha ámbitu selebra loron juventude 12 agostu, ne’ebé organiza hosi Alumni Parlamentu Foinsa’e Timor-Leste (APFTL) hamutuk ho Estudante Universidade Nasional Timor Lorosa’e (UNTL), Departamentu Peskas Siénsia Mariña no Juventude Hadomi Natureza (JHN), hodi kuda ai-parapa oan hamutuk 150, sábadu ne’e iha Metinaru, 05/08.
