Reportajen Adroaldo “Saretukau”
Ministra Reinu Unidu ba Indo-Pasífiku, Anne Marie Trevelyan hafoin hasoru malu ho Primeiru Ministru Xanana Gusmão, hatete katak, sira sei nafatin simu Timor-oan ba servisu iha United Kingdom (UK) ka Reinu Unidu maibé labele tama ho ilegal, maibé bele liu hosi visa regime (vistu rejime).
“Ami nia ben-vindu ba Timor-oan ne’ebé ba servisu iha Reinu Unidu, ne’ebé ba iha UK ne’ebé liu hosi dalan visa (vistu) migrasaun iha vistu rejime (visa regime), ami kontinua husik (permite) sira halo ida ne’e.” Ministra Trevelyan deklara, iha Palásiu Governu, sesta-feira, 29/09.
Sorin seluk seluk Primeiru Ministru Xanana dehan ida ne’e hanesan Ministra Trevelyan nia primeira vizita no koñese i sira nafatin hakarak ajuda Timor-Leste.
“Ha’u agradese tebes ba señora tanba ita iha Timor-oan liu rihun 20 mak iha UK ne’ebá, servisu hela iha ne’ebá. ‘Nia dehan, foin da-dauk mosu problemas, mosu problemas ho pasaporte, visa buat sira ne’e hotu, nia dehan katak lae, la’os problema ida ne’e, problema mak balun hakarak tama ho ilegal, ida ne’e mak labele’, mas nia mos dehan katak UK prontu atu simu tan Timor-oan sira ba servisu.”
Xanana hatete, ikus-ikus ne’e nia la ba Reinu Unidu maibé tinan hirak liuba nia hasoru malu ho Timor-oan sira iha ne’ebá, sira servisu ho kapas no iha área balu ne’ebé ita bele aproveita hodi fo servisu ba sira uainhira ita dada kadoras mai Timor-Leste.
“Ho señora ne’e mai, onra boot ida mai ita tanba primeira vez membru governu aas ida mai to’o ita ne’e.”
