Reportajen Joselina dos Santos
Estudante Universidade Nasional Timor Lorosa’e (UNTL), liuhusi Faculdade Agricultura (AG), Departamento Pescas e Ciência Marinha (DPCM), Preokupa tebes ho rekursu dosente ne’ebé maka menus hodi difikulta ba sira-nia prosesu ensino aprendisajem no difikulta mós ba estudante finalista sira atu orienta proposta no monografia. Tanba sira husu ba Magnífiku Reitor ho estrutura tomak hodi fó solusaun imediata ba sira-nia pereokupasaun atu sira labele sai vítima bebeik.
Liuhosi Konferensia Imprensa, Porta Voz Bendito dos Santos, hateten, UNTL nu’udar Universidade públiku no únika ida iha Timor – Leste , ne’ebé ho nia natureza ensinu públiku iha ne’ebé iha autonomia administrativa, patrimonial, sientífika, pedagójika no tutela diretamente ba Ministerio Ensino Superior ho Vizaun ne’ebé UNTL opta no hatuur iha planu estratéjiku mak” Sentru Exelénsia ba Ensinu Superior iha Timor – Leste”.
“Atu atinji vizaun ida-ne’e mak presiza iha kualidade ba prosesu ensinu aprendizajem ne’ebé diak hodi prodúz rekursu umanu kualifikadu ho kualidade aas hodi leno – an ba lema UNTL “Sapientia et Veritas” ka Matenek no lia Loos, Departamento Pescas e Ciência Marinha (DPCM), estabelese iha tinan 2017 no hahú simu estudante foun sira, iha tinan 2018 to’o agora tinan 2023 ho total estudante kuaze 600 resin ho objetivu atu prepara rekursu umanu ne’ebé kualifikadu hodi kontribui ba dezenvolvimentu nasionál espesifikamente ba iha dezenvolvimentu setor peskas no mariña nasaun Timor – Leste nian tanba iha liña kosteira ho komprimentu naruk 783 km no Zona Ekonómiku Exklusivu 77,474 km² ne’ebe riku no potensial tebes”, dehan Porta voz Bendito dos Santos, liuhusi komferensia imprensa iha Kampus Central, sexta 20/10.
Nune’e mós , programa IX governu konstituisionál kona-ba dezenvolvimentu setór ekonómiku, liliu ekonomia azul ka desenvolvimentu ekonomia bazeia rekursu ezistente iha area tasi soberana; peska, turismo, indústria no servsisu sira seluk tan. Bazeia ba objetivu estabelesimentu Departamento Pescas e Ciência Marinha iha leten, estudante konsidera sei sai deit retórika ka mitos iha sosiedade Timor-Leste, tanba preparasaun rekursu umanu iha UNTL la tuir vizaun no objetivu ne’ebé iha .
“Infelizmente buat ne’ebé akontese durante iha Departamentu Pescas e Ciência Marinha ne’ebé públiku presiza hatene, espesialmente inan no aman, sosiedade sivil, sivitas akadémikas no veteranus antigus kombatentes ba libertasaun iha Timor-Leste mak hanesan Rekursu Dosente espesialidade iha area Peskas no siénsia mariña la iha . Nune’e difikulta tebes estudante sira iha prosesu ensino aprendisajem ba estudante sira ne’ebé sei ativu iha aula no difikulta estudante finalista sira atu orienta proposta monografia ba peskiza”, nia Salenta.
