Reportajen Umbelina dos Reis
Durante akontesimentu udan boot, Sekretáriu Estadu Protesaun Sivil (SEPC), Domingos Mariano Reis ho nia ekipa tuun direita hodi salva komunidade ne’ebé afeita ba intensidade inundasaun 09/01/2024, ne’ebé akontese iha Aldeia Fatuc Francisco, Suku Camea, Postu Administrativu Cristu Rei. Komunidade ne’ebe afeita ba inundasaun ne’e por volta de uma kain sanulu resin lima (15).
“Intensidade udan ohin 09/01/2024 iha teritóriu Timor-Leste maibé intensidade boot liu mak iha Lospalos, Díli, Suai no Aileu. Udan nia intensidade volume, udan boot signifika katak distánsia udan been ne’e 5.1 milimetru. Iha munisípiu Díli udan boot nia impaktu 75% hetan inundasaun maibé iha fatin seluk ekipa APC ohin na’in 12 sei tun hodi monitoriza iha Díli laran hodi hetan dadus konkreta vítima na’in hira.” Dehan Autoridade ba Protesaun Sivil, Domingos Mariano Reis ba Jornalista sira, iha aldeia Fatuc Francisco, tersa-feira 09/01.
Nia informa, ohin sira salva ona vítima na’in ida iha Becuse, agora daudauk iha aldeia Fatuc Francisco, por volta komunidade uma kain 15, objetivu primeiru salva uluk vítima, segundu apoiu emerjénsia hafoin halo levantamentu.
Nia dehan, udan ohin nia intensidade volume inundasaun boot liu mak Suku Becora, Becusse, Audian,Tasi-tolu, Manuleu, Comoro 04 de Setembru.
Nia informa mos katak, provizoriamente seidauk iha sentru evakuasaun permanente maibé nafatin husu apoiu departementu relevante ne’ebé agora da-dauk eziste hela maibé fatin alto oituan nune’e vitima evakuasaun barak karik hela iha fatin seguru.
“Konabá material ne’e lalika preokupa tanba ami preparadu por volta 5 mil hodi apoiu emerjénsia no ekipamentus ba apoiu material kooperasaun. Konaba hahan vitima sira loron ohin no aban bainrua nian ami preparadu ona fós, mina, supermi no sardina no susuben ba labarik sira.” Dehan Sekretáriu Estadu APD.
Nia mensajen importante ba komunidade iha teritóriu Timor-Leste katak komunidade ne’ebé hela besik iha fatin risku hanesan foho lolon, mota ibun, tasi-ninin, ai-hun boot no inan feton isin rua no ferik-katuas agora kedas lori sira ba fatin seguru.
