Reportajen David da Costa
Reitór Universidade Nasionál Timor Lorosa’e (UNTL) husu ba IX governu no estadu atu sériu dezenvolve sidade universitáriu ne’ebé antes ne’e deside hodi muda ona husi Munisípiu Aileu mai Hera.
Reitór Universidade Nasionál Timor Lorosa’e (UNTL), João Soares Martins, hateten, ohin delegasaun hamutuk ho Vise Reitór UNTL hasoru malu ho Prezidente Repúblika (PR) José Ramos-Horta, hodi ko’alia kona-ba Universidade Nasionál Timor Lorosa’e (UNTL) nia progressu no mós informa kona-ba difikuldade ne’ebé universidade ne’e hasoru.
“Alende ida ne’e mos ko’alia kona-ba sidade universitáriu, Prezedente Republika iha interesadu tebe-tebes husu governu atu bele tau atensaun ba dezenvolvimentu infraestrutura UNTL ninian. Ita hotu hatene katak IX governu deside ona muda sidade universitáriu husi Aileu mai Hera, entaun ami ezije atu estadu no governu bele tau atensaun ba ninia progressu entermus dezenvolvimentu infraestrutura universidade ninian,” informa Reitór UNTL, João Soares Martins ba jornalista sira hafoin enkontru ho Prezidente Republika José Ramos-Horta, iha Palasiu Prezidensiál Bairu-Pite, Segunda 25/03.
Nia haktuir, Prezidente Republika José Ramos-Horta mos informa ba UNTL katak, nia iha estadu no kolega barak tebes ne’ebé bele ajuda mós kestaun infraestrutura. Nune’e nia bele aproximasaun ho Governu china ka Governu UEA ka Qatar karik sira bele iha interese atu apoiu dezenvolvimentu infraestrutura UNTL ninian maibé ida ne’e sei ideia. Tanba ne’e, Prezidente RepublikaJosé Ramos-Horta promete katak karik Xefe Estadu ba vizita china, Abudabi nia sei hato’o ideia ne’e mas hanoin importante mak Timoroan governu mak responsablidade aas liu atu bele tau prióridade ba investimentu infraestrutura.
Entretantu, iha enkontru ne’e Prezidente Repúblika José Ramos Horta 100% atu bele apoiu UNTL, sei ko’alia ho Primeiru Ministru Kay Rala Xanana Gusmão, atu oinsa bele tau atensaun maka’as ba UNTL, Tamba UNTL uniku Universidade estadu ka Governu no Povu Timor ninian, entaun tenke investe iha UNTL.
Nune’e mos, Antes ne’e, Prezidente Komisaun G Parlamentu Nasionál ne’ebé trata asuntu Edukasaun Joventude Sidadania no Kultura, deputadu, Armando dos Santos Lopez, hateten, kona-bá sidade universitáriu iha munisípiu Aileu ne’ebé VIII Governu lansa, maibé Obra la kontinua, tanba ne’e desizaun agora daudaun hosi nunu Governu nian katak, tenke fila hotu bá iha UNTL Hera, hodi konsentra bá iha ne’ebá no rezidénsia estudante sira hosi munisípiu hotu-hotu sei konsentra mós iha Hera.
Nia mós hato’o katak, UNTL mós preokupa tanba iha Orsamentu Jerál Estadu 2024 nian, IX Governu la preve hodi kontinua obra harii universitáriu Aileu ne’e. Tanba ne’e, iha OJE 2025 nian, nia rekomenda ba sira, tenke mai hato’o preokupasaun sira ne’e iha uma-fukun ne’e atu deputadu sira tenta ho Ministériu Ensinu Superiór oinsa bele haree iha tinan 2025 hodi preve orsamentu ba ida ne’e.
