Reportajen Joselina dos Santos
Komemorasaun Liberdade Imprensa iha loron 3 fulan maiu, Secretário Estado da Comunicão Social (SECOMS), Expedito Dias husu média sira hodi hadi’a kualidade notísia ho investigativu, nune’e bele kle’an atu hamenus públiku nia duvida liga informasaun sosiál ne’ebé komunidade enfrenta atu governu bele simu no hadi’a povu nia moris.
Governante ne’e hatutan, Komemorasaun Liberdade Imprensa iha tinan ida ne’e sei fokus ba oinsá atu hasa’e kualidade informasaun. Tanba Timor-Leste iha Index Liberdade Imprensa numeru 1 iha ASEAN. Entaun presiza buka oinsá Index Liberdade Imprensa ne’e bele manten ka sa’e, signifika katak ne’e servisu makaas husi média sira ne’ebé mai ho pápel importante mak informa eduka diverte no halo kontrolu sosiál.
“Tuir ha’u nia observasaun durante ne’e, IX Governu Konstituisionál média sira hala’o duni nia knaar no kumpri kódigu étika jornalizmu. Nune’e presiza hadi’a buat balun, liu-liu halakon duvida husi públiku kona-ba kualidade informasaun, dala barak ita seidauk balansu iha kobertura tanba fokus liu ba notísia seremonial nian. Sé bele tinan ida ne’e buka notísia sosiál ne’ebé povu imfrenta atu governu simu informasaun sira ne’e hodi hadi’a povu nia moris” dehan, Secoms iha Salaun SEI Caicoli, segunda 29/04.
Nia dehan, Média iha aspetu tolu mak bele hadi’a kualidade informasaun presiza iha kapasidade intelektual signifika publika notísia ho analiza kle’an, kapasidade profisionál mak liuhosi treinamentu ne’ebé iha ne’e atu aumenta jornalista sira-nia kapasidade profisionál, nomos kapasidade tékniku katak tenke atualiza preparasaun no oinsá bele hetan notísia ne’e sai diak.
“Tanba ne’e IX Governu Konstituisional liuhosi Secoms servisu hamutuk ho Konsellu Imprensa atu fó formasaun ba jornalista sira ho karakter investigativu no tenke husik notísia Streck News, maibe ita bele halo notísia ne’ebé kle’an liu investigativu atu labele mosu duvidas ba públiku. Tanba ho mudansa teknojia ne’ebé iha entaun ema idak-idak bele produs informasaun rasik, maske imformasaun hirak ne’e barak la liu husi edisaun ka la edit entaun bele hamosu Hoax iha sosiedade nia leet nune’e presiza hadi’a kualidade informasaun”, nia informa.
