Reportajen David da Costa
Prezidente Repúblika (PR) no Laureadu Nobel ba Pás, José Ramos-Horta, Iha loron 3 Outubru 2024, hahú ninia vizita privadu ba Austrália to’o loron 12 Outubru 2024.
Iha komunikadu Imprensa ne’ebe Neon Metin ohin Asesu husi Palásiu Prezidensiál Bairu-Pite, Vizita ida ne’e organiza hosi Institutu Austrália ho eventu sira ne’ebé organiza hodi komemora ninia aniversáriu ba dala 30, parte ida hosi programa tinan tomak ne’ebé aprezenta lider proeminente balu ne’ebé aprezenta sira nia “ideia boot sira”.
Durante vizita ida-ne’e, Prezidente Ramos-Horta sei partisipa iha enkontru nivel aas, hato’o diskursu públiku, no partisipa iha eventu akadémiku sira iha sidade oioin Austrália nian, inklui Sydney, Canberra, Hobart, no Melbourne.
Xefe estadu sei aprezenta palestra ida kona-ba valór independénsia nian: Lisaun sira ne’ebé aprende hosi Timor-Leste nia dalan ba Liberdade, iha Sydney Opera House, hato’o palestra ba Klube Imprensa Nasionál iha Canberra no hasoru malu ho membru sira hosi Parlamentu Austrália nian.
Prezidente nia vizita inklui mós vizita kortezia ho Governadór-Jerál Austrália nian, Sua Exelénsia Honorável Sam Mostyn AC, enkontru ho australianu proeminente sira iha área polítika, negósiu no sira ne’ebé envolve ho solidariedade Timor-Leste nian, palestra no sesaun Pergunta no Resposta iha Universidade Tasmania, no partisipa iha eventu podcast diretu iha Universidade Victoria, hodi diskute kona-ba lideransa, tranzisaun kareira, no esperiénsia pesoál sira
Prezidente Ramos-Horta subliña, Vizita ida-ne’e reprezenta oportunidade importante ida atu hametin ligasaun sira entre Timor-Leste no Austrália.
“Ita-nia nasaun sira fahe istória ida ne’ebé riku no kompromisu ba estabilidade no prosperidade rejionál. Ha’u hein atu hasoru malu ho líder, akadémiku, no sidadaun Australianu sira atu esplora dalan oinsa ita bele hasa’e ita-nia interese mútuu sira no aprende hosi ida-idak nia esperiénsia sira,” dehan Ramos-Horta.
Vizita ida ne’e subliña parseria ne’ebé dura entre Timor-Leste no Austrália, hodi fó plataforma ida ba Prezidente Ramos-Horta atu fahe perspetiva úniku Timor-Leste nian kona-ba independénsia, dezenvolvimentu, no kooperasaun rejionál.
