Reportajen Zevonia Vieira
“Sekretáriu Estadu Komunikasaun Sosial, nakloke nafatin para hadia liutan, garante liutan, iha dekretu lei sira, lei oan sira ne’ebe mak bele garante liutan ita nia liberdade”, Assanami
Iha ambitu komemora loron nasionál ba liberdade imprensa ba daruak, Vise Primeiru Ministru, Ministru Koordenadór Asuntu Sosial no Ministru Dezenvolvimentu Rural no Abitasaun Komunitária, Mariano Sabino Assanami hato’o nia diskursu katak, loron liberdade imprensa importante tebes, katak loron atu halo refleksaun, hodi fó onra ba sira ne’ebé laiha ona ita nia leet, ba sira nia luta ne’ebé husik hela hodi kontinua mantein serbisu hodi garante liberdade imprensa ohin loron.
Asanami dehan liberdade imprensa ne’e importante tebes ba ita, tanba nee parte integradu husi prosesu konstrusaun estadu no nasaun, “ema lubuk ida ne’ebe fo nia isin lolon, iha prosesu libertasaun nasionál, ita hotu hatene katak atu fo sai informasaun ne’ebe difisil tebes iha momentu ne’eba”.
Vice PM ne’e dehan iha prosesu naruk no mos Timor oan barak mak esforsu hodi hasai lian laek nian lian, hasai informasaun ne’ebe akontese iha rai laran, iha media oin-oin ne’ebe ita kria iha tempu rezisténsia, hanesan Vox Populi, Talitakum katak halo ita la toba katak hader bebeik, atu halo ema la toba, iha mos Suara Timor-Timur, konsege hasai mos lian lubuk ida, media sira ne’ebe ita harii iha tempu Indonesia, sempre fo sai informasaun importante.
“Ita nia jornalista di’ak lubuk ida iha momentu ne’eba hanesan Bernardino, kolega ida husi Indonesia Agus Mulyawan ne’ebe mate iha Timor-Leste. Tanba nee mak reprezenta Primeiru Ministru, hodi mantein no garante liberdade. Ita nia sosiedade ne’ebe demokrátiku, sosiedade ne’ebe halibur kakutak, halibur idea, halibur hanoin, deferénsia ne’e normal, idea oin-oin ne’e mak hariku no halo hanoin sira ne’e tasak liután, halo kro’at nafatin idak-idak nia hanoin”, dehan Asanami iha edifísiu Konsellu Imprensa, 08/10.
Nia hatutan ita nia deferénsia hanoin no idea ne’e laos inimigu ba malu, antes ita nia fundador sira moris ho diferente, moris ho idea ne’ebe oin-oin, sira mai ho teza no anti-teza para atu buka sinteza ne’ebe diak liu, tanba ne’e ho loron ne’ebe importante ita hakarak husu ba media ho jornalista hotu kontinua, haklaken lia los, garante mandatu konstituisional ne’ebe mak povu hotu tenke asesu ba informasaun ne’ebe sai direitu ba povu nian, direitu atu koalia ba media no asesu oin-oin.
Assanami dehan governu liuhusi Sekretáriu Estadu Komunikasaun Sosial, nakloke nafatin para hadia liutan, garante liutan, iha dekretu lei sira, lei oan sira ne’ebe mak bele garante liutan ita nia liberdade. Liberdade ida nee valores ida, prinsipiu ida ne’ebe luta nian, ho nune se deit mak atu kontinua luta ba ukun ida ne’e, tenke konsidera katak liberdade para koalia, liberdade para hato’o nia idea.
Nia konklui ho liberdade imprensa, liberdade iha publikasaun, iha debate no iha fatin ne’ebe nakloke para ema teste idak-idak nia idea.
Iha ámbitu loron liberdade imprensa ba daruak nian, ne’ebe monu iha loron 16 Outubru, Konsellu Imprensa hahu lansa feira foto jurnalismu, iha loron 8 Outubru hodi hasae públiku nia konesementu, hodi valoriza kontribuisaun jornalista no media iha prosesu luta ba ukun rasik an.
