Home EduTek The Blue Action Group Realiza Treinamentu Digital Literacy, Feminista Rezilensia Hasoru COVID-19

The Blue Action Group Realiza Treinamentu Digital Literacy, Feminista Rezilensia Hasoru COVID-19

160
0
The Blue Action Group realiza treinamentu konaba Digital Literacy. [Foto: Marilia Oliveira da Costa | 22.11.2020]

Reportazen Adroaldo ‘Saretukau’

“Ami nia objetivu hosi asaun azul ne’e atu haree liu ba iha oinsá atu halakon diskriminasaun, dezigualdade sira iha ami nia Grupu rasik, liu-liu atu implementa ba iha komunidade, ba juventude sira, ema vulneravel, ema LGBTI sira“. Marilia Oliveira da Costa

The Blue Action Group organiza treinamentu Digital Literacy ho tema “Feminista Rezilensia ne’ebé hasoru Pandemia COVID-19” ba juventude no estudante universitáriu sira, orgazanizasaun Asosiasaun Difisiente Timor-Leste (ADTL), Movimentu Feto Foinsa’e Timor-Leste (MOFFE) no grupu Arkuíris ne’ebé fasilita hosi editor Neon Metin, Zevonia Vieira iha Fundasaun Haburas – Farol.

Koordenadora Grupu Asaun Azul ka The Blue Action Group, Marília Oliveira da Costa hateten treinamentu ida ne’e atu refleta fila fali Surtu COVID-19 ne’ebé agora da-dauk la’o hela iha Timor-Leste.

 “Treinamentu ida ne’e ba juventude sira ba ema ho difisiénsia, grupu LGBTI sira no estudante sira, oinsá sira bele aprende konabá Digital Literacy”, hateten Marilia, 21/11.

Nia dehan liu hosi treinamentu ne’e atu partisipante sira bele hatene di-di’ak katak Surtu COVID-19 ne’e hamosu buat oi-oin iha uma laran hanesan, violénsia doméstik, diskrimiasaun no buat barak mosu durante Pandemia COVID-19 ne’e.

“Ho treinamentu ida ne’e mak hatudu katak hahalok sira ne’e ladi’ak, entaun oinsá para sira halo prevensaun. Sira fila-fali ba ho matéria ne’ebé sira hetan, sira mos bele aplika iha sira nia família, sira nia komunidade, liu-liu ba estudante sira iha eskola, atu nune’e sira bele halo prevensaun rasik ba sira nia aan. Sira mos halo prevensaun no fo atensaun ba iha komunidade, liu-liu ba família, inan-aman, se iha violénsia ruma karik, sira mos fo hanoin ka ideia ruma hosi treinamentu ne’ebé sira hetan”, dehan Marilia.

Koordenadora ne’e hateten Grupu Asaun Azul ka The Blue Action Group mak grupu ne’ebé nia refleta lalehan ne’ebé azul fo naroman ba ita no tasi azul ne’ebé fo anin fresku ho objetivu principal atu halakon forma hotu diskriminasaun kontra feto.

“Ami nia objetivu hosi asaun azul ne’e atu haree liu ba iha oinsá atu halakon diskriminasaun, dezigualdade sira iha ami nia Grupu rasik, liu-liu atu implementa ba iha komunidade, ba juventude sira, ema vulneravel, ema LGBTI sira, atu nune’e sira sai hanesan ema ida, bele dehan hanesan Arkuíris”, hateten Marilia

Grupu ne’e harii tanba haree ba situasaun COVID-19 ne’ebé afeita mundu inklui Timor-Leste, hodi limita movimentu sira. Liu hosi ne’e afeta barak liu ba inan feton sira, komunidade vulneravel sira.

“Liu hosi grupu ida ne’e ami hakarak fahe informasaun ba sira, atu sai kreativu liu tan hodi atende di’ak konabá COVID-19, atu halo prevensaun ba sira nia an no oinsá sira bele asesu ba atividade ekonomia, maske limita sira nia movimentu maibé oinsá sira bele halo movimentu no aktividade sira ho kreatividade oi-oin”, hateten Marilia

Partisipante hosi MOFFE, Nuno Gomes sente kontente no ogullu bele partisipa iha treinamentu ne’e no hetan máteria importante sira, liga ho utilizasaun média social.

“Ha’u sente orgullu tebes ami mai tuir formasaun ida ne’e. Formasaun ne’e ha’u foin tuir mais ha’u kontenti tebes, tanba ha’u hetan pontu importante hanesan oinsá fahe informasaun Pozitivu, informasaun ne’ebé loloos wainhira ita uza Média Social”, hateten partisipante Nuno.

Nia hatutan husi treinamentu ne’e nia bele fo hanoin hikas ba nia kolega sira, wainhira sira fahe informasaun ne’ebé la loos.

Iha fatin hanesan estudante UNTL, Jessenia Maria D. C. da C. Gomes hateten hosi treinamentu ne’e ajuda nia atu fahe informasaun ne’ebé lolos iha Média Social.

Hosi treinamentu ne’e hanorin ita oinsá uza Sosial Média ho di’ak no atu fahe informasaun ne’ebé ho di’ak, tanba dala barak ema fahe informasaun lalos ka Hoax. Ema fahe informasaun, dala ruma ita fahe tutan hodi hamosu Hoax ka Misinformation.

Jessenia agradese ba Grupu The Blue Action ne’ebé realiza ona treinamentu ida ne’e, tanba liu hosi treinamentu ne’e, hodi hasae nia konnesimentu konaba digital literacy

LEAVE A REPLY

Please enter your comment!
Please enter your name here