Reportajen Umbelina dos Reis
Misa aniversáriu ba loron nasional juventude ba dala-19 no Masakre Santa cruz, 12 de Novembru ba dala-33. Sua Eminensia Dom Virgilio Cardeal do Carmo da Silva husu ba foinsa’e sira tenki respeita malu, kria pas, dame, domin no unidade iha sosiedade. Nu’udar foinsa’e tenki hanoin katak, saida mak halo ba ita nia rai iha futuru.
Sua Eminensia Dom Virgilio Cardeal do Carmo da Silva, SDV, liu-hosi nia omilia esplika katak ohin ita komemora loron masakre Santa Kruz, ita hanoin fali konflitu ne’ebé akontese iha tinan 1991, nune’e ohin selebra missa ita hanoin fila-fali hodi agradese ba Maromak tanba momentu ne’eba juventude barak mak luta hodi liberta ba rai ida ne’e.
“Liu-hosi batizmu ita haree malu hanesan maun no alin, mezmu mai hosi munísipiu selu-seluk maibé liu-hosi batizmu ita bele hadomi malu sai unidade. Nune’e ohin ita mai halibur malu iha fatin ida ne’e tenki tane as nafatin espiritu patriotizmu no nasionalismu ba rai ida ne’ebé ita hetan libertasaun ba ohin loron nian.” Esplikasaun hosi Sua Eminensia Dom Virgilio Cardeal do Carmo da Silva, SDV, iha Igreja Motael, tersa-feira, 12/11.
Nune’e husu ba ita hotu presiza espiritu ne’ebé matenek, nune’e hanorin Timoroan hotu hodi haree tuir heroi sira nian, foinsa’e sira ne’ebé hadomi sira nia rai tenki estuda maka’as hodi defende no valoriza rai doben Timor-Leste. Husu ba joven Timor-oan sira hadomi malu, respeita malu no servisu hamutuk iha nasaun ida ne’e.
“Nune’e ezize ba foinsa’e sira tenki kria pas, dame, domin iha familia no sosiadade nia laran, respeita malu, iha espiritu marjinál oan no aman nian. Nune’e nu’udar foinsa’e tenki hanoin katak saida mak ha’u halo ba iha nasaun ida ne’e, oinsá mak hatudu ha’u nia domin ba rai ida ne’e. Nune’e orsida ita prosisaun hosi Igreja Motael to’o Santa Kruz ida ne’e mak tradisaun, nune’e hanoin nafatin heroi sira nia luta signifika joven sira la’o tuir nafatin sira-nia ain fatin signifika ita moos tenki sakrifika ita-nia an ba rai doben Timor-Leste.” Sua Eminensia Dom Virgilio Cardeal.
