Reportajen Filomena da Conceição
komemora loron Internasional dos Direitus umanus ba dala 76, Provedoria dos Direitus umanus no Justica (PDHJ), iha komerasaun ida ne’e, tempu ona para atu hametin komprimisiu hodi defende direitus umanus, tuir konstitusional haruka.
komemora loron Internasional dos Direitus umanus ne’e, tema global “Ita Nia Direitu, Ita Nia Futuru, Agora”, no mos, PDHJ define tema Nasional maka “O nia direitu, Hau nia Dever”, hodi garante nafatin ba direitu sidadaun sira ne’ebe sei violadu.
Provedór dos Direitus Umanus no Justiça (PDHJ), Virgilio da Silva Guterres “Lamukan”, hateten, komemorasaun loron internasional dos direitus umanus nee importante, nune’e tempu ona para atu hametin komprimisiu hodi defende direitus umanus sidadaun sira nian direitu tuir lei haruka.
“Ita atu hametin ita nia kompromisu hodi defende direitus umanus, tuir konstitusionál haruka, lei haruka no tuir ita nia vontade ne’ebe espresa liuhusi ratifikasaun no dokumentus internasional sira, ne’ebe parlametu ratifika dezde tinan 2003, entaun tempu ona para atu hametin liu tan”, dehan Provedor Direitus Umanus i Justisa, Virgílio ba jornalista sira iha Suai Room Timor-Plaza, Tersa 10/12.
Nia haktuir, ohin loron importante tanba linternasionalmente, komemora loron deklarasaun universal direitus umanus ninian ba dala 76, ba Timoroan, hafoin restaura nia indenpensia iha 2002, sempre komemora ida ne’e.
“Em-felizmente tinan ida ne’e ita komemora iha situasaun ne’ebe mak realidade sosial hatudu katak ita nia sosiedade liu-liu sidadun barak kontinua sofre tanba sira nia direitu liu-liu direitu ekonomiku, direitu sosial no kultural kontinua sai violadu tanba desizaun politika husi estadu no governu halo”, Nia Esplika.
“Hanesan, Ita hotu akonpana tinan kotuk liuhusi Kazu evikasaun ne’ebe akontese iha Dili laran no iha Baucau iha Fatin espasu publiku kontinua la’o no too agora komunidade sira balun seidauk hetan fatin neebe apropriadu ba sira no labarik barak mak afetadu tanba asesu ba edukasaun no sira tenke fila ba munisipiu,” Nia esplika liutan.
Nune’e mos, iha setor saude no prestasaun servisu saude afetadu tanba rekursu no problema ai-moruk ne’ebe mak falta ida ne’e, signifika katak, sidadaun barak ninia direitu ekonomiku sosial seidauk nakonu.
“Loron ohin ita komemora atu hanoin malu tanba Provedor direitus Humanus hanesan entidade Ida neebe mak existe atu tau matan ba asuntu protesaun ditetus umanus nian”, nia esklarese.
Liuhusi komerasaun refere PDHJ, apela ba entidade publiku sira liu-liu estadu katak, kazu violasaun diretus umanus ida ne’e, governu hanesan responsavel ba ezekusaun ba atividade politika publika ninian no tenke tau atensaun atu hakonu povu nia diretu sosial.
Entretantu, orador prinsipal ba komemosaun loron internasional dos direitus umanus ninian mai husi Presidente komisariu CAC, Rui Prereira do Santos, Inspektur jeral do Estadu (IGE), Presidente Administrasaun Publika no Adjunta PDHJ, Maria Marilia da Costa no hetan partisipasaun maximu husi estudante universitariu, alumi parmentu foinsa’e, membru PDHJ, no organizasaun sosiedade sivil Sira.
