Reportajen David da Costa
Primeiru-Ministru (PM), Kay Rala Xanana Gusmão konsidera vizita hosi Ministru bá Asuntu Internu, Ministru Imigrasaun no Asuntu Multikulturál, Ministru bá Seguransa Sibernétika, Ministru bá Arte Austrália, Tony Burke MP nu’udar aktu ida hodi reforsa kooperasaun bilaterál entre Timor-Leste (TL) ho Austrália.
Durante vizita Ministru Tony Burke ne’e ko’alia liu kona-bá relasaun kooperasaun amizade entre Austrália ho Timor-Leste liu-liu ko’alia kona-bá Timor-oan sira ne’ebé bá servisu iha Austrália, kona-bá seguransa no Ciber Security.
“Ita apresia tebtebes tanba Ministru Tony bele mai to’o iha ne’e hodi reforsa ita-nia kooperasaun. Sira mós apoia ita tama ASEAN. Ami-rua ko’alia en-jerál de’it, espesifiku sira sei ko’alia ho ministru sira,” Dehan Primeiru-Ministru (PM) Xanana Gusmão Iha komunidadu Imprensa ne’ebe Neon Metin asesu husi Gabinete PM iha Tersa 28/01.
Iha fatin hanesan, Ministru Tony Burke MP hateten, relasaun amizade entre Timor-Leste ho Austrália forte tebes, liu-liu iha área edukasaun no mós ho traballadór sira tanba iha relasaun forte entre ema ho ema.
Austrália komprometidu atu kontinua servisu hamutuk ho Timor-Leste hodi rezolve dezafíu sira ne’ebé fahe hamutuk hanesan migrasaun irregulár, inklui kontrabandu ka hatama ema ho illegál, tráfiku umanu, jestaun fronteira no seguransa sibernétika.
Molok hasoru malu ho Primeiru-Ministru Xanana Gusmão, Ministru Australianu ne’e hasoru-malu ona ho Prezidente Repúblika, José Ramos-Horta, Ministru Interiór Francisco da Costa Guterres, sei hasoru-malu mós ho Ministru Transporte no Komunikasaun, Miguel Marques Manetelu.
Durante enkontru Xefe Governu akompañadu hosi Ministru Prezidénsia Konsellu Ministru, Agio Pereira, Ministru Negósiu Estranjeiru no Kooperasaun, Bendito dos Santos Freitas, Ministru Interiór, Francisco da Costa Guterres, Embaixadora Timor-Leste iha Austrália, Inês Almeira no Xefe Gabinete PM, Elizabeth Exposto no Ministru Tony Burke akompaña hosi Embaixadora Austrália iha Timor-Leste, Caitlin Wilson.
