Home Notisia Filomeno Paixão: Populasaun Lalika ba Kahur, Mantein Hakmatek, Orgaun Soberanu Sira Sei...

Filomeno Paixão: Populasaun Lalika ba Kahur, Mantein Hakmatek, Orgaun Soberanu Sira Sei Iha

710
0
Ministru Defeza Seguransa No Ministru Interiór Interinu, Filomeno da Paixão de Jesus (Foto: Media PR)

Reportajen Santina LDA

Relasiona ho konfrontasaun ne’ebe mosu iha Parlamentu Nasional entre deputadu ho deputada sira, parte seguransa kontinua asegura funsionamentu Parlamentu Nasional. Ministru Defesa husu populasaun sira lalika ba tama kahur, mantein hakmatek tanba orgaun soberanu sira sei iha.

“Polisia iha, asegura hela parlamentu tantu iha laran ho iha liur, Deputadu ho Deputada sira kontinua halo diskusaun entre sira, ita espera Parlamentu bele funsiona fila-fali. Iha Parlamentu ne’eba seguru, tantu iha laran no iha liur seguru, konaba seguransa laiha problema,” Ministru Defeza Seguransa No Ministru Interiór Interinu, Filomeno da Paixão de Jesus hato’o ba Jornalista sira hafoin enkontru regular ho Prezidente Republika iha Palasiu Prezidensial, Aitarak-Laran, loron, 19/5.

Bazeia ba ejizensia seguransa ba deputadu  ho deputada sira iha plenaria, Ministru esplika katak intervensaun tenke hetan autorizasaun husi Prezidente Parlamentu Nasional. Ami mantein labele to’o iha situasaun ida krime. Bainhira iha situasaun  krime halo dezorden boot iha Parlamentu laran, impede funsionamentu Parlamentu nian, seguransa iha obrigasaun normaliza situasaun para Parlamentu bele funsiona fila-fali.

Ministru Defeza Seguransa No Ministru Interiór Interinu, husu ba povu Timor-Leste atu kontinua mantein hakmatek no labele intervein ba problema politika rai-laran.

“Mensajen mak ne’e, populasaun ida-idak tur nonok iha nia fatin, ita nia lider partidaria sira sei iha, ita nia Prezidente Republika iha, ita nia Prezidente Parlamentu Nasional iha, ita nia Primeiru Ministru iha. Membru governu sira ne’ebe mak kaer area sira ne’e, sei iha hotu. iha posibilidade atu deside situasaun ne’e,” Informa Filomeno da Paixão de Jesus.

Ministru ne’e mos apelu  ba populasaun, lalika ba kahur  iha problema ne’ebe pretense ba parte politiku nian, tanba ita laos foin mak liuhusi krize ida, ita iha posibilidade, ita iha kompetensia, ita iha kapasidade atu rezolve krize.

Durante enkontru ho Prezidente Republika, Xefe Estadu Hateten sempre akompaña situasaun no Prezidente Republika fiar katak , iha Parlamentu Nasional sei rezolve problema tanba iha deputadu sira, iha Prezidente Parlamentu Nasional no iha Vise-Parlamentu Nasional.

“Hau mos fiar katak sira bele rezolve situasaun ne’e, no hau rasik sei ajuda atu rezolve situasaun ne’e,” Garante, Filomeno.

LEAVE A REPLY

Please enter your comment!
Please enter your name here