Reportajen Juvinal Cabral dos Santos
“Ksolok boot ida ba ha’u hodi simu imi hotu iha Resesaun Loron Nasional Japaun nian. Tinan ida nee, ita mai halibur hamutuk iha nee hodi selebra aniversáriu Sua Majestade Imperador Japaun nian ba dala 65, ne’ebe monu iha loron haat liu ba iha loron 23 fulan Fevereiru,” dehan Embaixador Japaun iha Timor-Leste, Tetsuya Kimura iha nia diskursu, Embaixada Japaun 27/02/2025.
Embaixador mos hato’o nia agradesimentu sinseru ba Sua Presidenti Republika Timor Leste José Ramos-Horta ba nia prezensa iha okaziaun selebra aniversáriu Sua Majestade Imperador Japaun nian iha kalan ne’e, no
nia apoiu kontinua ba kooperasaun entre Japaun no Timor-Leste.
Embaixador haktuir Sua Majestade Imperador no Imperatriz sempre reza ba bem-estar povo Japaun nian no povu sira iha mundu tomak. Sua Majestade sira espesialmente reza ba paz mundu nian no preokupa ho
Vitima desastre naturais sira no hirak ne’ebe servisu iha linha frente hodi oferese ajudus tantu iha
rai laran no mos iha rai liur.
“Sua Majestade mak símbolu nasaun nian, no símbolu unidade husi povo Japaun. lda ne’e oportunidade ba dala tolu mai ha’u hodi sai uma-nain ba Resesaun Loron Nasional nian
iha Timor-Leste. Tinan rua liu ba, Exselensia Prezidenti halo komentariu ba ha’u nia deskursu iha lian Tetun katak “klaru no kompreensível, maibe ho sotaque Japonês ne’ebe forte”dehan embaixador Japaun.
Embaixador Tetsuya Kimura agora haree fila fali ba tinan rua ikus nee, nia kontenti hodi rekonhese katak iha desenvolvimentu
barak iha relasaun bilateral. Relasiona ho ida nee, nia hakarak destaka vizita husi Primeiru Ministru nian ba Japaun iha Dezembru 2023. Primeiru Ministru Xanana Gusmão partisipa iha “Simeira Komemorativa ba Tinan 50 Amizade no Kooperasaun ASEAN-Japaun” nian iha Tóquio no realiza simeira bilateral ida ho Primeiru Ministru Kishida iha tempu ne’eba.
“Hafoin sorumutu bilateral nee, lideransa rua ne’e hasai Deklarasaun Konjunta ida ba Imprensa, hodi eleva relasaun
ida ne’e ba parseria abrangente ida. Dokumentu ida ne’e sei serve hanesan fundasaun ida ba ita
nia governu rua hodi hametin liu tan ita nia amizade no kooperasaun. Tinan rua liu ba, wainhira hau to’o iha Timor-Leste, hau halo promesa ida katak hau sei esforsu másimu hodi alkansa progresu real sira iha ita nia relasaun bilateral iha área sira tuir mai nee.”
Embaixador ne’e salienta Primeiru, nia hakarak reforsa liutan kooperasaun entre nasaun rua ne’e ba indústria prinsipais sira iha Timor-Leste,
hanesan agrikultura no peskas.
“Japaun no Timor-Leste iha buat komun barak, ida mak ita nia domin ba foos, kafe no aifunan sira. Durante tinan hirak Ikus ne’e, governu Japaun oferese ona
apoiu konstante iha área kultivasaun foos iha Timor-Leste, no sei kontinua hodi fahe ami nia experiênsia sira, esplika embaixador Tetsuya Kimura.
Iha fatin hanesan Prezidente Republika Timor-Leste Jose Ramos Horta mos agradese ba Embaixadór Tetsuya Kimura no Mme Kimura-san tanba konvida nia ba resepsaun ida-ne’e hodi selebra aniversáriu ba dala 65 Sua Majestade Imperadór Japaun nian.
“Ida-ne’e hanesan ksolok ida atu iha kalan ne’e entre belun barak hosi Japaun, no ha’u hamutuk ho ema hotu hodi hato’o ha’u nia parabéns no dezeju di’ak liu ba moris-di’ak no moris naruk hosi Sua Majestade Imperiál Naruhito” hateten Prezidende Republika Timor-Leste.
PR hatutan halibur hamutuk iha ne’e atu selebra aniversáriu ba dala 65 hosi Sua Majestade Imperadór Japaun nian, ne’ebé marka mós aniversáriu ba dala 6 hosi Sua Majestade Imperiál nia asesaun ba tronu nu’udar Imperadór Japaun nian ba dala 126.
“Ha’u hamutuk ho ema millaun sira iha mundu tomak hodi hato’o parabéns no orasaun sira ba Sua Majestade Imperiál nia matenek ne’ebé laiha rohan no saúde ne’ebé di’ak atu serbí povu Japaun nian.”
Timor-Leste no Japaun fahe valór komún ne’ebé abut iha demokrasia, liberdade individuál, respeitu ba direitus umanus, no estadu direitu. Tinan ida ne’e, iha loron 20 fulan Maiu, sei marka aniversáriu ba dala 23 husi estabelesimentu formál relasaun diplomátika entre Timor-Leste no Japaun.
“Japaun sai nu’udar parseiru xave ida iha Timor-Leste nia dezenvolvimentu, fó kontribuisaun folin-laek ba ita-nia nasaun nia progresu hanesan provérbiu Japaun nian ida dehan, “Nu’udar belun, la’o iha ha’u-nia sorin.” Loos duni, Japaun sempre sai belun metin ba Timor-Leste. Iha fulan Agostu 2024, S.E. Sr. KOMURA Masahiro, Vise-Ministru Parlamentár ba Negósiu Estranjeiru Japaun nian, vizita Timor-Leste, iha-ne’ebé nia halo vizita kortezia ba ha’u no Primeiru-Ministru Xanana Gusmão. Ninia vizita reafirma ami nia kompromisu atu aprofunda kooperasaun bilaterál.”
Timor-Leste mós agradese ba Japaun nia apoiu metin adezaun ba ASEAN, partikularmente liuhosi inisiativa kapasitasaun ne’ebé fasilita husi JICA. Esforsu sira-ne’e ajuda Timor-Leste kumpre rekizitu sira ne’ebé trasa ona iha ASEAN nia Roteiru ba Adezaun.
