Nesesidade nasaun membru mak sei dezenvolve-an hela aumenta ho nune’e Asian Development Bank (ADB) hasae ninia kapasidade fo debe. Aumentu kapasidade fo debe ne’e Presidente ADB, Masato Kanda hato’o iha nia diskursu bainhira loke sesaun Enkontru Konsellu Governador nian ba Dala-58, ohin, iha Milan, Italia.
“Atu responde ba demand aba asistensia hosi nasaun membru sira mak dezenvolve-an hela, iha reforma jestaun kapital foin lalais ne’e ami hasae kapasidade fo impresta to’o Bilaun $100 ba dekada ida tuir mai,” Presidente Kanda hato’o iha ninia abertura ba Enkontru Konsellu Governador nian.
Ida ne’e signifika ADB sei hasae ninia volume serbisu pursentu 50% durante dekada ida ne’e. Iha tempu hanesan tanba dezafiu ne’ebe hasoru aumenta no iha kompelxidade bo’ot, sei hadiak liutan sira nia serbisu hodi fo impaktu bo’ot liutan, no la presija husu rekursu adisional hosi ADB nia doador sira.
Presidente Kanda mos hatete katak, “ba nasaun ki’ik sira, liliu ba Small Island Developing States, ne’ebe dezastre naturais bele fo impaktu bo’ot bainhira kompara ho dimensaun ekonomia nasaun nian, ami sei introdus mekanizmu jestaun imprestimu hodi ajuda halo kma’an restrisaun liquidasaun ba tempu krizi nian”.
Timor-Leste nudar nasaun membru ne’ebe dezenvolve-an hela hola parte mos nudar Small Island Developing States. Tuir Ministra Finansas, Santina José Rodrigues Ferreira hatete katak ADB nia doasaun ativu no portofolio imprestimu nian iha montante Milioens $756. Hirak ne’e aloka primariamente ba konektividade transporte, fornesementu bee moos no dezenvolvimentu urbanu, agrikultura, seguransa aihan, no rezilensia rura.
“Timor-Leste nia parseria ho ADB ba imprestimu konsensional nian, iha investementu hamutuk miloens $615,65. Ida ne’e reprezenta besik 71% hosi total imprestimu ne’ebe governo asina ho instituisaun finansial internasional sira,” Ministru Santina hato’o iha intervista.
“Ba period 2025 – 2028 iha tiha ona planu doasaun no projetu sira mak establese ona, ho total projetu 15 ho valores osan besik Miloens $600. Planu ida ne’e inklui finansiamentu ADB nian no finansiamentu hamutuk. Orsamentu ida ne’e sei kobre setor sira mak liga ho dezenvolvimentu sosial no humanu, transporte, be no dezenvolvimentu urbanu, agrikultura no enerjia,” Ministra hatutan liutan.
Hosi imprestimu ne’ebe Timor-Leste halo, imprestimu balun liu ona periode de grasa nian, no Timor-Leste hahu dadaun ona selu funan imprestimu nian ho valor 1% hodi kada imprestimu.
