Reportajen Silvino Freitas
Relasiona ho labarik idade minoridade ne’ebé fa’an sasan hanesan krupuk ho manu-tolun iha estasionamentu semáfro iha Dili laran Polísia Nasional Timor Leste (PNTL) husu tenke involve INDDICA atu halo asaun ruma tanba ne’e risku ba labarik sira, nune’e polísia bolu ona atensaun inan aman nian maibe labarik sira kontinua fa’an, nune’e mós Ministeriu Solidaridade Sosial Inkluzasaun (MSSI) konsidera governu tenke servisu hamutuk ho familia maske tau ona atensaun barak maibe susar atu resolve no dadaun nee governu selu hela labarik sira ho idade minoridade.
Portavoz PNTL suprentidente Joao Belo dos Reis dehan, labarik sira ne’ebé faan sasan iha estrada ita haree kestaun seguransa ba labarik sira nee parte polísia mos preokupa maibe atuasaun ne’ebé polísia halo tenke involve INDDICA hodi halo asaun ruma tanba nee risku ba labarik sira nia vida iha area estasaun semafro nian.
“nee mos naran diak ba nasaun nian tanba ita husik labarik sira ita dehan kontrolamentu husi autoridade menus” dehan Portavoz PNTL suprentidente Joao Belo dos Reis ba journalista Neon-metin iha kuartel jeral PNTL Kaikoli, (09/07).
Nia dehan tan, polísia nafatin hala’o ninia kna’ar bolu labarik sira ba eskuadra PNTL hodi koalia ho inan aman atu labele halo maibe nafatin labarik sira kontinua fa’an sasan iha area estasionamentu semafro nian, tanba sira labarik entaun komptensia polísia nian mak bolu inan aman.
“hau husu mos ba ajensia sira ne’ebé servisu ba labarik sira nee tenke foti medidas ruma ita labele husik ita nia oan sira atu faan manu-tolun depois fo risku ba sira nia vida risku mos ba sira nia edukasaun tempu atu estuda inan aman labele haruka fali oan sira atu aproveita oan sira” dehan Portavoz PNTL suprentidente Joao Belo dos Reis.
Nia esplika polísia tranzitu hamutuk ho polísia VPU nian hala’o atuasaun beibeik ona bolu inan aman no intrega ba parte relevante sira atu halo atensaun maibe kontinua lao tanba nee polísia nafatin halo koordenasaun husi autoridade no ajensia relevante asuntu labarik nian hodi foti asaun ruma.
Entretantu kona-ba asuntu nee jornalista tenta konfirma ho MSSI Veronica das Dores dehan, labarik sira ne’ebé dadaun nee faan sasan iha dalan ninin hetan ona atensaun husi servisu asuntu social labarik nian hodi bolu no koalia ona maibe kontinua nafatin nunee nia konsidera presiza familia atu servisu hamutuk ho governu no tenke iha komprensaun katak labarik sira ne’e iha direitu ba eskola tanba sira iha osan estadu selu sira husi $8 $9 too $10 no difisiente $15 tanba nee presiza familia servisu hamutuk governu mesak labele no familia mesak mos labele.
“ami iha instituisaun solidaridade hamutuk 38 ne’ebé tau matan ba labarik sira, tanba labarik sira nee iha kategoria 2 dimensaun labarik sira ne’ebé livre dader ba eskola loraik mai aprende iha sentru ne’ebé fo han sira haris no hanorin sira, nunee politika governu nian maka governu mesak labele no familia mesak mo labele tenke servisu hamutuk” konklui MSSI Veronica.
