Reportajen David da Costa
Ema kontinua So’e lixu arbiru no halo’o sidade sai foer, tanba ne’e Prezidente Repúblika (PR) José Ramos-Horta husu ba governu atu monta CCTV iha kapital Dili atu nune’e bele kapta ema sira ne’ebe kontinua so’e lixu ne’e, para kaer haruka sira multa atu nune’e sira tauk labele so’e lixu arbiru tan.
Prezidente Repúblika (PR), José Ramos-Horta, hatete, ne’eduni agradese ba hotu-hotu, maibé la para iha ne’e, favor feto no mane sira iha ne’e, loro-loron haree servisu saneamentu foti lixu iha Dili laran ne’e. Maibé ema balun ho nia kareta paradu, sira iha kareta laran so’e tun lixu husi kareta lakoi tun mai hodi soe lixu iha nia fatin.
“Iha Dili, hamoos Dili laran, maibé imi balun ho imi nia karreta prado, imi nia pic up, iha karreta laran, ho família ho fen, ho namorada, labarik sira, dala ruma hatun vidru soe plástiku husi janela karreta nian,” dehan Prezidente Republika iha iha Jardim Ponte BJ Habibie, Sexta 25/07.
Nia explika, depois piór liu track sira no loja sira boboot ne’e sira ba halo lixu iha Hera, Metinaro to’o iha Tibar fakar lixu iha fatin hotu-hotu, Estadu gasta osan hodi halo fatin lxu no sanementu sira hamoos iha sidade laran maibé ema kontinua soe lixu no moras kontinua iha Timor-Leste. No tenke respeitu ema sira ne’ebe hamoos sidade laran.
“Imi mak responsabilidade ba moras kontinua iha Timor, tanba lixu oi-oin, estadu gasta osan ho saneamentu, hamoos sidade track sira. Imi karik haluha, ha’u nu’udar Prezidente Repúblika nunka haluha sira, tanba ha’u nu’udar Prezidente Repúblika kondekora fó omenajen ba sira ne’ebé foti lixu ne’e,” Nia dehan.
Nia haktuir motorista sira, sira ne’ebé foti lixu iha óspital nian, sira mak foti lixu ema nia ne’ebe fakar iha fatin hotu-hotu, maibé ema la aprende, kakutak laiha, sentidu responsabilidade laiha, no ba iha kareta sira ne’ebe dala barak soe lixu arbiru.
“Ba iha karreta soe lixu, ha’u haree ho ha’u nia matan dala barak, butinak balun karreta laran soe lixu, ita baruk haree ona ne’e,” Nia subliña
Tanba ne’e governu devia halo polítika ruma tau ka monta CCTV iha sidade laran para haree se mak soe lixu multa maka’as kedas ba ema sira ne’ebé so’e lixu arbiru. Maibé mós sei ko’alia ho Embaixada Xina atu ajuda monta CCTV iha Dili laran para se maka so’e lixu arbiru karik bele kaer.
“Rai CCTV iha sidade tomak, ha’u husu ba Embaixada Xina, favór tau kámara ba ami iha sidade tomak, nune’e hafuhu ema hotu-hotu, se mak soe lixu kaer kedas,”Nia dehan.
