Home Notisia PR Apresia VIII Governo Tanba Aprova Medidas Ba Rekuperasaun Ekonómika

PR Apresia VIII Governo Tanba Aprova Medidas Ba Rekuperasaun Ekonómika

685
0
Prezidente da Republika, Dr. Francisco Guterres Lu Olo. [Foto: Copyright Media PR | 03.03.2020]

Reportazen Zevonia Vieira

“Ita-nia populasaun liu 40 % mak moris iha kiak nia laran no família barak moris ho tusan. Ita hotu hatene katak restrisaun husi estadu emerjénsia, hahú iha fulan Marsu tinan ida ne’e to’o ohinloron, hamenus maka’as konsumu família sira-nian. Infelismente dezempregu sae problema boot liután ba ita-nia ekonomia”. Prezidente Lu Olo.

Mundu ohin loron hasou laloran boot, liu hosi virus Corona ne’ebe sai ameasa boot ba ema hotu, tanba virus Corona hamate ona ema rihun ba rihun iha nasaun barak nia laran no fo ameasa ba seitor ekonomia.

Liu hosi loron nasional Juventude ne’ebe monu iha loron 12 Novembru, Prezidente Republika, Dr. Francisco Guterres Lu Olo hatoo lia menon ba partisipante sira hotu katak, mundu tomak ohin loron moris iha inserteza boot nia laran, tanba pandemia ne’ebé provoka husi Covid-19. Enkuantu sientista sira halo esforsu boot hodi dezenvolve vasina ida atu trava Covid-19, ema liu millaun ida rihun atus rua mate ona no besik millaun 50 mak infetadu hela. Ita la hatene bainhira loos mak ita bele halakon pandemia ida ne’e.

Prezidente hateten molok pandemia Covid-19 afeta mundu tomak, iha fulan Marsu liubá, ita hasoru tiha ona resesaun ekonómika iha ita-nia rain. Covid-19 halo ita-nia situasaun rai-laran at liután.

“Ita-nia populasaun liu 40 % mak moris iha kiak nia laran no família barak moris ho tusan. Ita hotu hatene katak restrisaun husi estadu emerjénsia, hahú iha fulan Marsu tinan ida ne’e to’o ohinloron, hamenus maka’as konsumu família sira-nian. Infelismente dezempregu sae problema boot liután ba ita-nia ekonomia”, hateten Prezidente Lu Olo.

Prezidente Repúblika hato’o apresiasaun ba VIII Governo, tanba aprova ona medidas ba rekuperasaun ekonómika no medida balun hahú implementa dadaun ona. Prezidente Repúblika fiar katak medida sira ne’e sei lori impaktu pozitivu,  iha momentu loos, hodi tulun ita-nia sidadaun sira hasoru susar oioin.

Prezidente dehan ba oin tenke servisu hamutuk, ho matenek no laran tomak no moos,  atu ita rekupera no haburas liután ita-nia ekonomia. Nune’e de’it mak ita bele dezenvolve ita-nia País hodi garante bein-estar no sustentabilidade ba Povu tomak.

“Ha’u fiar katak dalan ne’ebé efisiente liu hodi ita prepara futuru ida di’ak liu ba ita-nia oan sira mak liuhusi aposta maka’as ba sira-nia edukasaun no saúde, hodi abanbainrua sira bele sai produtivu liu no efikás liu, no bele domina teknolojia foun ne’ebé importante tebes iha kontestu atual”, hateten Prezidente Lu Olo.

Prezidente konklui katak juventude Lorico Aswa’in nia isin no raan mak bele sai kbiit no forsa ba imi joven sira agora. Timor-Leste independente presiza timoroan hotu-hotu nia servisu, esforsu, dedikasaun no vontade atu serví.

Prezidente fo hanoin ba joven sira tenke estuda, aprende hamutuk no valoriza pasadu nia eroízmu no hanoin polítiku ba futuru. Inisiativa no kriatividade mak sai sasukat loloos ba ezersísiu ita-nia sidadania no ema servisu na’in. Prezerva no defende valores luta nian no valores no prinsípius Estadu nian, Demokrasia no mós Direitu nian ne’ebé halo ita povu no nasaun Independente.

Prezidente mos alerta katak kontinua proteje nafatin ita-nia povu husi moras Covid-19, tuir regras estadu emerjénsia nian katak uza beibeik máskara iha fatin ho ema, hadook-an malu metru ida ho balun, fase liman beibeik ho sabaun no horiuluk hori wain, ita proteje malu nafatin no fo’o liman ba malu nafatin.

Print Friendly, PDF & Email

LEAVE A REPLY

Please enter your comment!
Please enter your name here