Reportajen Umbelina dos Reis
Ministru Negósiu Estranjeiru no Kooperasaun (MNEK), Bendito Freitas, ohin enkontru ho Primeiru-Ministru Kay Rala Xanana Gusmão no membru governu halo koordenasaun Interministeriál ba da-2 kona-ba adezaun Timor-Leste ba ASEAN.
Ministru Negósiu Estranjeiru no Kooperasaun (MNEK), Bendito Freitas liuhosi nia diskursu hateten, iha enkontru koordenasaun interministeriál daruak ne’e kona-ba prosesu adezaun Timor-Leste nian ba ASEAN, bainhira ita hakbesik ba momentu istóriku ida admisaun formál iha ita-nia ba Simeira ASEAN ba dala 47 iha loron 26 Outubru 2025.
” Reuniaun ministru negósiu estranjeiru ASEAN nian ba dala 58 reafirma kompromisu unánime ASEAN nian ba adezaun Timor-Leste nian, hodi rekoñese ita-nia dezempeñu sólidu iha pilár tolu komunidade nian no operasionalizasaun unidade Timor-Leste iha sekretariadu ASEAN nia laran.” Dehan Ministru Negósiu Estranjeiru no kooperasaun (MNEK), Bendito Freitas, liuhosi nia diskursu iha salaun Nobre MNEK, Pantai Kelapa, segunda-feira, 28/07.
Nia informa, enkontru ne’e mós destaka kona-ba importánsia husi koordenasaun besik entre Ministériu Negósiu Estranjeiru no Kooperasaun (MNEK) no Ministériu Ekonomia hodi formula no implementa prioridade ekonómika ASEAN nian. Nune’e apelu ba sinerjia ho objetivu atu hametin efikásia inisiativa ekonómika ASEAN nian, liuliu iha ámbitu vizaun 2045 ASEAN nian no reflete abordajen integradu, trans-setoriál ne’ebé ita mós tenke adota bainhira ita prepara ba adezaun tomak.
” Tanba adezaun akontese iha kontestu jeopolítiku ida ne’ebé kompleksu ba beibeik, tanba relatóriu resente kona-ba tensaun fronteira entre Kamboja no Tailándia ne’ebé agora daudaun iha mediasaun internasionál nia oko ne’e fó hanoin mai ita kona-ba importánsia kontinua husi prinsípiu prinsipál sira hanesan pás, unidade, diálogu, no rezolusaun konflitu pasífika nian.” Nia dehan.
