Reportajen Silvino Freitas
Relasiona ho kazu asediu seksual ne’ebé komete husi autor judisiál ka balun uza karreta estadu maka Provedor Direitu Umanu no Justisa (PDHJ) Virgilio Guterres ‘Lamukan’ sente triste tebes no husu entidade publiku hotu atu to’o iha konkordánsia ida katak laiha toleránsia ba ema ne’ebé uza fasilidade publiku ba ninia interese no husu mós ba autor judisiáriu hotu atu labele buka apoia malu maibá ho pozisaun ida katak hahalok ne’ebé autor judisiál halo ne’e halo parte ba ninia privadu atu labele hafo’er integridade seitor justisa nian.
Provedor Virigilio Guterres ‘Lamukan’ dehan, ema sira ne’ebé sai vitima ka sai prejudikadu sei iha liberdade no asesu naton atu hetan justisa ba asuntu refere no nia iha konesimentu ba ida nee tanba familia no kolega husi vitima fo ona informasaun balun maski seidauk iha keixa formal besik fulan ida liu ba kotuk, nunee nia haree katak hamosu tendensia ida ne’ebé tenta halo alin feto ne’ebé hatoo keixa nee sai fali vitima tanba iha social media.
“primeiru ba ita sira tenke buka hatene informasaun loloos konaba maibe informasaun atu loos oinsa ita hotu tenke too konkordansia ida katak ita la tolera ofisial publiku sira uza fasilidade publiku ka halo violasaun ka halo buat ne’ebé tuir sira nia hakarak” dehan Provedor Virgilio ba jornalista sira hafoin remata serimonia tomada posse ba kargu xefia nain 10 iha salaun CNC Balide, (01/08).
Nia dehan tan, ita hotu labele konkorda atu ofisial publiku sira nee labele uza karreta ka fasilidade publiku ba interese rasik ka pesoal nee make ma hotu tenke konkorda, nunee atu loos ka sala nee fila fali ba desizaun no prosesu tomak tribunal maka desidi tuir prosesu legal no kontinua konsidera prejunsaun inosensia nee, nunee kestaun sira nee nia triste tebes tanba involve ema sira ne’ebé publiku iha konfiansa iha seitor justisa nian no halo fo’er seitor justisa nia imajen.
“hau hein katak maluk sira seluk iha seitor justisa buka meus oinsa atu restaura imajen seitor justisa nian ba ita nia publiku atu nunee ema ida ho rua nia sala la hamonu seitor justisa nian integridade” dehan Provedor Virgilio.
Kona-ba autor judicial sira ne’ebé atu apoiu okmun prokurador ne’ebé komete asediu seksual ba joven feto nia dehan, pozisaun provedoria ba justisa nian maka karreta nee fasilidade publiku no patrimonio estadu nian no labele uza ba atividade pesoal nee ita hotu tenke konkorda ida nee, nunee kona-ba apoia ba kolega sei la halakon inisiativa liuhusi prosesu formal tanba nia rasik iha ona komunikasaun hatene prosesu loloos nee oinsa nunee nia la dun konkorda esforsu atu poia malu iha profisaun tanba ita nia kolega nee halo sala.
“buat ne’ebé sala ita hamutuk rekonese sala nee husu deskulpa ba publiku kolega nee sala nee ninia sala pesoal la reprezenta entidade publiku, se dignu liu duke ita mobilize apoiu publiku atu apoiu kolega ida ninia hahalok, ita hotu halo sala maibe ita buka sala ida ne’ebé ke se moe karik ita deit mak moe, foer karik ita deit mak foer labele estadu mos foer hotu ema barak mos foer hotu nee ema dehan moral professional, sala hau mak responsabiliza” konklui provedor Virgilio.
