Reportajen David da Costa
Feto Timoroan nain lima ne’ebe la kontinua sira nia estudu iha universidade, no mosu inisiativa rasik, hodi hari’i kampaña lokál Runa’s Crochet (RC), hodi halo negósiu ki’ik atu sustenta sira nia moris.
Kompañia nee empodera feto foinsa’e sira liu-liu ba iha kriatividade, halo produsaun pasta, brinku, karteira, sasan ba labarik no sasan dekorasaun ba uma.
Nain ba Kompaña Lokál Runa’s Crochet (RC), Virginia Amaral Soares hatete kompaña Runa’s Crochet ida ne’e halibur grupu feto foinsa’e sira,
kompaña ne’e rasik mesak feto, oinsa atu empodera feto foinsa’e sira, liu-liu iha kreatividade, atu bele halo negosiu rasik no sustenta moris.
“Tanba ami rasik la kontinua ami nia eskola iha nivel licensiatura, ho ida ne’e maka ami iha insitativa hakarak buka rasik negosiu ida ne’ebe bele sustenta ami liu-liu ba feto sira, maske ami la bele kontinua ba eskola maibé buka meius oinsa ami bele hetan osan husi kreatividade ne’ebe ami halo,” dehan nain ba Kompaña Lokál Runa’s Crochet, Virginia, Bainhira partisipa iha konferensia Ekonomika Emprezarial Timor-Leste ho Australia iha iha Sentru Konvensaun Dili (CCD), kinta 7/08.
Ba nia eventu ne’e importante tebes, tanba ida ne’e bele tulun kampaña lokál sira, hodi hetan koneksaun ho loja sira, atu nune’e bele hatama produtu sira, no bele hetan tulun husi NGO sira par buka dalan ba kompaña lokal sira.
“Eventu ida ne’e primeira ves ba iha ami, ida ne’e importante tebes ba ami, sira fó tolun ami atu bele lori ami nia sasan ba hatama iha sira nia loja Timor plaza, no ohin iha NGO balun ne’ebe maka husu, atu tulun ami bele dezenvolve nafatin, maski ida ne’e ki’ik maibé diak ba futuru,” nia hatete,
Bainhira atu partisipa iha feira ida ne’e, liu husi aplikasaun trade Investe Timor-Leste nian, tanba trade Investe simu aplikasaun ne’ebe maka ho numeru boot tebes, maibé kompaña Runa’s Crochet aplika no bele liu.
“Eventu ida ne’e sai esperansa boot tebes ba ami, ami bele servisu makaas atu bele lori ami nia produtu ba iha merkadu no ami bele hetan mos koneskasaun ruma” nia espresa.
