Reportajen Silvino Freitas
Arkivu Muzeun Resistensia lansa filme ‘As FALINTIL Na Luta Pela Libertasaun Nasional’ neebe produz hodi komemora loron sikentenariu ezistensia FALINTIL, nunee autor ba filme nee mai husi lideransa sira neebe funda no komanda FALINTIL no filme nee atu fo hanoin nafatin jerasaun foun sira hodi lidera nasaun no oinsa hanoin ba futuru timor leste ida diak liu.
Tuir Diretor Ezekutivu AMR-I.P Jorge Alves ‘Wee moris’ dehan, filme nee halo hodi komemora ezistensia loron FALINTIN nian neebe halo ona ba tinan 50, tanba nee loron nee loron importante no kosidera loron osan-mean ba timoroan hotu, nunee husi filme nee atu fo hanoin ba jerasaun foun sira tanba FALINTIL tinan naruk nia laran fo sira nia vida sakrifika an iha ailaran ba luta ukun rasik an.
“filme dokumentariu ida nee mai husi autor principal autor vivo sira neebe dadaun nee sei moris maibe ita fo onra no Gloria nafatin ba sira neebe sei moris, tinan ida importante ba jerasaun foun sira atu banati tuir eroi sira” dehan Diretor Ezekutivu AMR-I.P Jorge Alves ‘Wee moris’ ba jornalista sira hafoin halo tiha lansamentu ba filme As FALINTIL Na Luta Pela Libertasaun Nasional iha AMRT-IP Dili, (03/09).
Nia dehan tan, filme refere foin hahu nia produsaun hodi komemora loron FALINTIN neebe monu iha loron 20 fulan agostu neebe too dadaun nee halo ba tinan 50 ka cinquentenario ezistensia FALINTIL nian, nunee sira halo deit lansamentu maibe seidauk bele halo publikasaun maibe antes sira atu publika sira tenke halo regulamentu ruma atu ema seluk labele copia.
Entretantu Xefe Estadu Maior F-FDTL Tenete Jeneral Falur Rate La’ek dehan, iha kondisaun estremo deversidade kombatentes sira hatudu disiplina ejemplar no ligasaun klean ho komunidade neebe sira proteje no dadaun nee F-FDTL uza valor sira neebe FALINTIL sira uza sai hanesan identidade lealdade ba patria respeita ba diginidade umana no sobordina poder military nian.
“dokumentu ida nee iha importasia 3, ida preservasaun ba memoria istorika hodi garante katak ita kombatente nia hahalok eroiku la lakon ba tempu, nuudar instrumentu edukasaunsional ba jerasaun atual pesoal military sira hodi fo komprensaun klean ba abut istoriku ita nia instituisaun nian, nuudar kontribuisaun ba identidade reafirma katak espiritu FALINTIL neebe labele haketak husi konstrusaun estadu timor leste nian” dehan Tenete Jeneral Falur Rate La’ek iha ambitu lansamentu filme, (03/09).
Tenete Jeneral Falur Rate La’ek konklui, nia sente agradese ba AMRT neebe servisu ho folin boot hodi preserva patrimonio istoriku tau matan nafatin ba akontesimentu sira hotu iha teritoriu nasional hodi preserva ita nia luta koletiva sofrementu koletiva no vitoria koletiva, F-FDTL iha responsabilidade fo honra ba legadu ida ne’e hodi garante katak valor neebe FALINTIL luta ba indepedensia soberania.
