Reportajen Silvino Freitas
Bankada KHUNTO iha parlamentu nasionál sei vota afavor ba proposta lei halakon total pensaun mensal vitalísia ne’ebé sira rasik submete ona husi bankada 3 maka CNRT, PD ho KHUNTO, ne’ebé ho karakter urjensia.
Deputada Olinda Guterres husi bankada KHUNTO dehan, husi bankada KHUNTO iha nia reprezentante deputadu nain 5 iha parlamentu nasionál ne’ebé prontu ona atu halakon lei pensaun vitalísia, nune’e aprovasaun urjensia ne’ebé halo ona ne’e atu halakon tiha pensaun vitalísia tuir povu nia hakarak.
“Ami sira deputadu iha ne’e la’ós para tiha servisu mos simu nafatin osan, ne’e la justu ona joven estudante sira agora halo manifestasaun ne’e direitu sira nian tenke halo duni, joven sira ne’e inan aman haruka mai eskola mós laran susar la mampu osan mai husi ne’ebé maske iha kapasidade estuda, ami deputadu sira ne’e la dada is tanba laran metin ba pensaun vitalísia” dehan deputada Olinda hafoin halo diskusaun iha parlamentu nasionál, (19/09).
Nia dehan tan, dalan ne’ebé di’ak liu maka ohin halo aprovasaun urjensia ne’e no iha dia 25 mak halo diskusaun iha jeneralidade, maibé lei refere tenke hamoos laos halakon de’it sorin maibé halakon mos ba eis titular hotu hotu, nunee asaun ne’ebé estudante halo ne’e dalan ida tuir direitu sira nian, nune’e lei seguransa sosiál sei la kaor ho pensaun vitalísia maibé atu koa osan deputadu sira nian.
“Labarik kiik mak halo demo mos ita tenke rona nia la vota maibe nia inan aman vota nia maun vota, ne’ebé dia 25 mai ami apoiu 100% ami nain 5 dehan ba malu ona, balun kiak ba beibeik” dehan deputada Olinda.
Nia dehan, enkuantu deputadu husi bankada seluk mak nia la hatene maibe husi bankada CNRT, PD ho KHUNTO iha ona komitmentu tomak atu hasai ka halakon tiha lei pensaun vitalísia, nune’e nia husu ba estudante sira ne’ebé halo manisfestasaun atu kontinua fali sira nia estudu tanba sira disponibel ona atu halo tuir ejijénsia ne’ebé hato’o tiha ona liu husi manifestasaun, no sei laiha tan ona pensaun vitalísia hahú husi titular sira too mai deputadu sira.
Nune’e bankada CNRT, PD ho KHUNTO aprenzenta tan projetu lei ba revoga pensaun mensal vitalísia ba deputadu no eis titular sira husi orgaun soberania no providensia seluk, projetu lei ne’e aprova ho karakter urjensia no iha votasaun pasa ho unaniminidade votus afavor 59 kontra 0, abstensaun 0.
