Reportajen David da Costa
Prezidente Repúblika (PR) José Ramos-Horta ho Primeiru-Ministru Austrália Anthony Albanese reafirma sira nia kompromisu atu reforsa mobilidade traballadór nian iha ámbitu programa Pacific Australia Labour Mobility (PALM) no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia nian.
Prezidente Repúblika (PR) José Ramos-Horta, simu Primeiru-Ministru Austrália, Honorável Anthony Albanese, iha vizita ofisiál loron rua mai Timor-Leste. Vizita ne’e hatudu parseria ne’ebé dura ba tempu naruk entre nasaun rua ne’e.
Prezidente Ramos-Horta, hamutuk ho Primeiru-Ministru Xanana Gusmão, Vise-Primeiru-Ministru sira, membru Governu no korpu diplomátiku sira, simu Primeiru-Ministru Albanese bainhira to’o iha Aeroportu Internasionál Nicolau Lobato ho serimónia benvindu tradisionál Timoroan nian.
Iha jestu ida ne’ebé reflete lasu pesoál sira amizade nian, Prezidente Ramos-Horta lori nia veíkulu elétriku Moke hosi aeroportu to’o iha Palásiu Prezidensiál Nicolau Lobato, akompaña hosi Primeiru-Ministru Albanese no Primeiru-Ministru Xanana Gusmão.
Iha Palásiu Prezidensiál, Primeiru-Ministru Albanese simu ho serimónia ofisiál benvindu nian, ne’ebé inklui Hino Nasionál sira hosi nasaun rua, inspesaun hosi Guarda Honra nian no aprezentasaun hosi delegasaun sira hosi nasaun ida-idak. Líder na’in rua ne’e bá iha Salaun ASEAN hodi halo asinatura ba livru bainaka nian no fotografia ofisiál ida, tuir kedas ho enkontru entre líder na’in rua ne’e, akompaña husi sira nia membru delegasaun sira.
Nune’e iha enkontru ne’e, Prezidente Ramos-Horta hato’o Timor-Leste nia agradesimentu kle’an ba Austrália nia apoiu konstante ba dezenvolvimentu iha setór oioin. Diskusaun sira foka ba hametin kolaborasaun iha diversifikasaun ekonómika, seguransa marítima no dezenvolvimentu kapitál umanu.
No líder sira reafirma sira nia kompromisu atu reforsa mobilidade traballadór nian iha ámbitu programa Pacific Australia Labour Mobility (PALM) no promove kooperasaun iha matéria seguransa nian, iha ámbitu akordu bilaterál 2022 nian, ne’ebé abranje formasaun iha matéria defeza nian no hametin kapasidade polísia nian. Diskusaun sira seluk subliña apoiu ba kreximentu setór privadu no projetu estratéjiku boot sira, inklui dezenvolvimentu Greater Sunrise.
Bainhira remata ho enkontru ne’e, Prezidente Repúblika José Ramos-Horta ho Primeiru-Ministru Austrália Anthony Albanese troka prezente ba malu hodi kria lasu amizade nafatin iha futuru.
Nune’e mos iha parte lorokraik, Prezidente Ramos-Horta konfere ba Primeiru-Ministru Albanese Grande Colar da Ordem de Timor-Leste, kondekorasaun aas liu iha nasaun, nu’udar rekoñesimentu ba nia dedikasaun hodi hametin lasu bilaterál sira.
Rezidente Repúblika José Ramos-Horta hatete, Timor-Leste no Austrália la’ós viziñu de’it maibé nu’udar família tanba ne’e ohin nasaun rua ne’e reafirma nia pozisaun atu la’o hamutuk iha tempu naruk.
“Ita nu’udar família. Ita-nia istória ne’ebé fahe, valór komún no ita nia kompromisu ba pás no prosperidade halibur ita. Ohin, ita reafirma ita nia promesa atu la’o hamutuk ruma ba futuru ida ho seguransa, oportunidade no amizade ne’ebé dura ba tempu naruk,” dehan Prezidente Repúblika José Ramos-Horta iha komunikadu Imprensa ne’ebe Neon Metin asesu husi Palásiu Prezidensiál Bairu-Pite, Kuarta 28/01.
Tanba Timor-Leste no Austrália estabelese relasaun diplomátika formál iha tinan 2002. Ohin loron, parseria ne’e abranje kooperasaun polítika, ekonómika, seguransa no sósiu-kulturál, hodi reflete vizaun ne’ebé fahe ba rejiaun ida ne’ebé estável, prósperu no iha ligasaun.
